Хүн амын дунд өвчлөл, нас баралтын тэргүүлэх шалтгааны нэг болох зүрх судасны өвчнөөс урьдчилан сэргийлэх, иргэдийг үзлэг, оношилгоонд хамруулах, эрүүл мэндийн боловсрол, мэдлэг мэдээлэл олгох зорилготой “Цусны даралт ихсэлтийн эсрэг аян-2026” өнөөдөр Дорноговь аймгийн Замын-Үүд суманд нээлтээ хийлээ.
Тус аяныг энэ жил 6-р сард Архангай, Завхан аймагт амжилттай хэрэгжүүлсэн бол аяны багийнхан энэ сарын 28-29-нд Говьсүмбэр аймагт ажиллаад, үргэлжлүүлэн 9-р сарын 30-наас 10-р сарын 1-ний өдрүүдэд Замын-Үүд сумын иргэдэд хүрч үйлчлэхээр аяны дөрөө мултлаад байна.
“Цусны даралт ихсэлтийн эсрэг аян-2026” аяны хүрээнд зүрх судас, зүрхний шигдээс, мэдрэл, тархины цус харвалт, бөөр, хоол боловсруулах эрхтэний эмгэг зэрэг нарийн мэргэжлийн эмч нар зорилтот бүлгийн иргэдэд үзлэг хийж, зөвлөгөө мэдээлэл өгөхөөс гадна эрүүл мэндийн боловсрол олгох сургалтууд зохион байгуулж буй. Иргэд өдөрлөгт хүрэлцэн ирснээр үзлэг, оношилгоонд хамрагдахын зэрэгцээ эрүүл мэндээ хянах, өвчлөлөөс урьдчилан сэргийлэх зөвлөмж, мэдээлэл авах боломжтой юм.
Аяны нээлтэд Замын-Үүд сумын Засаг дарга Б.Сайнбаяр, П.Н.Шастины нэрэмжит Улсын гуравдугаар төв эмнэлгийн Эмнэлзүй эрхэлсэн дэд захирал Б.Нандинцэцэг болон ХААН Банкны Замын-Үүд салбарын захирал Д.Баярмаа нар оролцож, иргэдийн дунд цусны даралт ихсэх өвчнөөс урьдчилан сэргийлэх, эрт илрүүлгийг нэмэгдүүлэхэд хамтын ажиллагааны ач холбогдлыг онцлон тэмдэглэлээ.
ХААН Банк, П.Н.Шастины нэрэмжит Улсын гуравдугаар төв эмнэлэг (УГТЭ), Нийгмийн эрүүл мэндийн үндэсний төв (НЭМҮТ), Монголын үндэсний олон нийтийн радио, телевиз (МҮОНРТ) хамтран 2017 оноос хойш хэрэгжүүлж буй энэхүү аяны хүрээнд өнгөрсөн есөн жилийн хугацаанд Монгол Улсын 21 аймгийг бүтэн тойрч, 72 гаруй мянган иргэнийг нарийн мэргэжлийн эмчийн үзлэг, оношилгоонд хамруулан, эрүүл мэндийн зөвлөгөө, мэдээллээр хангаад байна.
Тус аяныг Замын-Үүд суманд анх удаа хэрэгжүүлж, иргэдийн дунд үзлэг оношилгоо хийж байгаа нь онцлог юм. Монгол Улсын өмнөд хилд орших Замын-Үүд сум нь цаг агаарын хуурай, эрс тэс уур амьсгалтай төдийгүй тээвэр ложистикийн зангилаа бүс тул автомашин ачаа тээврийн урсгал хамгийн өндөр байдаг. Тус сумын иргэдийн эрүүл мэндэд тухайн орчны хуурайшилт, тоосжилт, цаг уурын эрс тэс нөхцөлөөс гадна хөдөлмөр эрхлэлт, амьдралын хэв маяг зэрэг олон хүчин зүйл нөлөөлөх боломжтой. Үүний зэрэгцээ хүн амын төвлөрөл болон хил, тээвэр, худалдааны үйл ажиллагаа эрчимтэй явагддаг онцлогтой учир эрүүл мэндийн урьдчилан сэргийлэх үзлэг, эрт илрүүлэг, эрүүл мэндийн боловсролын арга хэмжээг тогтмол зохион байгуулах шаардлагатайг эмч нар онцолж байна. Иймээс энэ удаагийн аян нь иргэдийн цусны даралт, зүрх судасны эрсдэлийг эрт илрүүлэх, зорилтот бүлгийн иргэдийг нарийн мэргэжлийн үзлэг, оношилгоонд хамруулах, эрүүл мэндийн боловсролыг дээшлүүлэхэд чухал ач холбогдолтой юм.
Иргэд та бүхэн эрүүл мэндийнхээ төлөө өөртөө цаг гаргаж, урьдчилан сэргийлэх үзлэг, оношилгоонд идэвхтэй хамрагдахыг уриалж байна.
Улаанбаатар °C 
Сэтгэгдэл (0)
Сэтгэгдэл бичигдээгүй байна