​ ШИНЭ намын төлөөллүүд аймгийн ИТХ-ын дарга Б.Батжаргалд хариуцлага тооцохыг шаардлаа

ШИНЭ намын дарга Ц.Гантулга, Архангай аймгийн ИТХ-ын төлөөлөгч  бөгөөд  тус аймаг дахь ШИНЭ намын хорооны дарга Ц.Амаржаргал нар аймгийн ИТХ-ын дарга Б.Батжаргалын талаар мэдээлэл өглөө.

Энэ үеэр ШИНЭ намын дарга Ц.Гантулга “Архангай аймгийн ИТХ-ын төлөөлөгч Ц.Амаржаргал болон манай намын орон нутаг дахь гишүүд аймгийн ИТХ-ын дарга Б.Батжаргал, түүнд хамаарах баримт фактуудыг дэлгэж, Монголын ард түмэн, Төр засагт хүргэхээр ирсэн. Тэгэхээр ИТХ гэдэг байгууллага маань иргэдийн төлөөллийн байгууллага мөн үү гэдэг асуудал руу орж байна. Жишээ нь миний хувьд 16 жил ИТХ-д сонгогдон ажилласан. Засаг захиргааны нэгж, түүний удирдлагын тухай хуулийн 51.1.3, 51.1.4 зэрэг заалтыг ноцтой зөрчсөн үйлдэл байна. Үүнд хариуцлага тооцох ёстой гэдгийг эрх баригчдад дуулгаж байна” хэмээсэн.

Харин аймгийн ИТХ-ын төлөөлөгч Ц.Амаржаргал “Сүүлийн гурван жил гаруй  Архангай аймагт гурван Засаг дарга солигдлоо. Аймгийн ИТХ тогтвортой ажиллахгүй байна. ИТХ-ын хурлын дарга Б.Батжаргал нутгийн удирдах байгууллагын нэр хүндийг унаган, ИТХ-ыг чадамжгүй болгосон. Аймгийн ИТХ-ын дарга нь төрийн өндөр албан тушаал. Үндсэн хуульд төрийн үйл ажиллагааны үндсэн зарчим нь шударга ёс, тэгш байдал, хууль дээдлэх хэмээн засан. Гэвч энэ хүн хуулийг гууль болгосон. Засаг захиргааны нэгж, түүний удирдлагын тухай хуулийн 46.2-т Иргэдийн нутгийн хурал, аймгийн ИТХ-ыг улиралд нэг удаа хуралдуулна гэж заасан. Гэвч энэ хүн өөрт ашигтай бол хурал зарладаг, ашиггүй бол хурал зарладаггүй. Хурал болоход хаяад явчихдаг. Аймгийн Гэмт хэргээс урьдчилан сэргийлэх зөвлөл гэж бий. Энэ зөвлөл авто машин жолоодож яваад, алдаа гарган торгууль төлсөн торгуулиар санхүүждэг. Энэ торгуулийг Б.Батжаргал шамшигдуулсан. Манай аймагт малын хулгай их байна. Хотоо харлуулж, суурь малаа алдсан 2-3 өрх бий. Одоо ч хулгайчийг бариагүй. Учир нь гэмт хэрэгтэй тэмцэх зардлыг Б.Батжаргал дарга хувьдаа ашигласан. Энэ хүн улс төрд нөлөө бүхий этгээд тул хариуцлагаа хүлээх ёстой. Эрээ цээргүй даргыг огцруулах санал гаргахад АН-ын бүлгийнхэн хурлаа хаяж явсан. Одоо ч тэр хурал нээлттэй байна. АН-д шударга гишүүд бий. Та нар нэг удаа хамгаалсан байж болно. Намаас ямар хариуцлага тооцохыг бид анхааралтай ажиглана.   Ард түмнийхээ талд байна гэж найдаж байна. Хулгайч даргатайгаа хамт сонгуульд өрсөлдөнө гэвэл ард түмэн хүлээн авахгүй болов уу.  Хэрэв аймгийн АН арга хэмжээ авахгүй бол би дараагийн арга хэмжээг авна. Бид эдгээр мэдээллийг АТГ-т хүлээлгэн өгнө гэлээ.