Цасан шуурганаар ээж нь 12 настай хүүгээ эцсийн амьсгал хураатлаа хамгаалжээ

-45-хан настай малчин эмэгтэй С нь төрсөн хүүтэйгээ хамт өнгөрөгч амралтын өдрүүдэд болсон цасан шуурганаар амь насаа алдав. Ээж, хүүгийн зул гэрийн хойморт бадамлана, ямар их уй гашуу вэ.

Төв аймгийн Лүн сумын малчин Ч-гийнх ам бүл дөрвүүлээ амьдардаг байжээ. Том охин хотод оюутан, бага хүү Е нь аав, ээжтэйгээ амьдардаг байв. Сургуулийн амралт эхлэнгүүт 12 настай хүү хөдөө гэртээ очсон нь.  

 Малчин Ч-гийнх өвөлжөө рүүгээ нүүх өдөр хүү нь ээжтэйгээ мөн хажуу айлынхаа 16 настай хүүгийн хамт гурвуулаа явганаар малаа тууж явж байжээ. Гэрийн эзэн Ч эрүүл мэндийн шалтгаантай тул өөрөө машинаа барьж явсан аж.

Гэвч нүүдлийн үеэр гэнэт цасан шуурга шуурч эхэлжээ. Малаа тууж явсан ээж, хүү хоёр бие биеэсээ салалгүй шуургийг сөрж явсаар харамсалтай нь амь насаа алджээ. Тус аймгийн Онцгой байдлын газрын алба хаагчид тэднийг эрэн хайх ажиллагааг зохион байгуулж, энэ сарын 5-ны өдөр 13:07 цагт ээж, хүү хоёрын цогцсыг гэрээс нь урд зүгт 15 км-аас олсон байдаг.

 Харин 16 настай эрэгтэй айлд эсэн мэнд очсон байна.

Эрлийн багийнхан анх олоход ээж нь хүүгийнхээ дээрээс давхарладаж хэвтсэн байдалтай олдсон гэж талийгаачийн ар гэрийнхэн халаглана. Эцсийн амьсгал хураатлаа хүүгийнхээ амыг аврах гэж тэмцсэн "баатарлаг" ээж гэж хоолой зангируулна. 

Нэг айлын хоёр хүн хорвоогоос золгүйгээр явж, үгээр илэрхийлэхийн аргагүй уй гашуутай суух талийгаачийн ар гэрийнхэн "Сум, аймгийнхаа онцгой байдлын албаныханд баярлалаа" гэдгээ биднээр дамжуулж илэрхийлсэн юм.