ИНЕГ-ЫН МЭРГЭЖИЛТНИЙ АМИНД ХҮРСЭН СЭЖИГТЭН ХИЛ ДЭЭР БАРИГДЛАА

Энэ сарын 18-ны өдөр Иргэний нисэхийн ерөнхий газрын Худалдан авах ажиллагааны хэлтсийн ахлах мэргэжилтэн Х, мэргэжилтэн Б нар согтууруулах ундаа хэрэглэсэн үедээ бусадтай хувийн таарамжгүй харилцаа үүсгэж, улмаар зодолдсоны улмаас нэг нь амь насаа алдсан харамсалтай хэрэг гарчээ.

Хэргийг тодруулбал, ИНЕГ-ын ахлах мэргэжилтэн Х болон Б нар нь Сүхбаатар дүүргийн нэгдүгээр хорооны нутаг дэвсгэрт байрлах "River Sounds" гэх цэнгээний газар үүрийн 04:00 цагийн орчимд согтууруулах ундааны зүйл хэтрүүлэн хэрэглэсэн үедээ гарч яваад, 4-5 залуутай маргалдаж, тус цэнгээний газрын үүдэнд зодолдсон аж.

Зодооны улмаас ИНЕГ-ын мэргэжилтэн Х нь хүнд гэмтэл авч, ГССҮТ рүү ухаангүй байдалтай яаралтай түргэн тусламжаар хүргэгдэн очжээ.

Тэрээр хүнд гэмтэл авсан байсан учраас ГССҮТ-ийн Эрчимт эмчилгээний тасагт нийт дөрвөн хоног ухаангүй, эмчилгээ хийлгэж байгаад энэ сарын 22-ны өдөр нас барсан байна.

ИНЕГ-ын мэргэжилтэн Х-ийн амь насанд бүлэглэн халдсан гэх дөрвөн сэжигтнийг цагдаагийн байгууллагаас цагдан хорьж, мөрдөн шалгах ажиллагаа явуулж эхэлсэн байна. Цагдаагийн байгууллагаас цагдан хорихоос өмнөх өдөр дээрх хэрэг үйлдсэн гэх дөрвөн сэжигтний нэг нь Монгол Улсын хилээр гарах гэж байгаад баригджээ.

Хэрэг гардаг өдөр талийгаачтай хамт байсан ИНЕГ-ын мэргэжилтэн цагдаагийн байгууллагад хандаж өргөдөл гаргасан бөгөөд одоогоор хохирогчоор тайлбар мэдүүлэг өгч байгаа аж. Мөн өнөөдрийн байдлаар хэрэгт холбоотой этгээдүүдээс мэдүүлэг авч, мөрдөн шалгах ажиллагаа явуулж буй юм байна.