ЗГХЭГ-ЫН РЕФЕРЭНТ н.ГАНБАТЫН БИЕИЙН БАЙДАЛ ТААРУУ БАЙНА

Засгийн газрын Хэрэг эрхлэх газраас төрийн албан хаагчдыг атестатчилах ажлыг улсын хэмжээнд өрнүүлж байгаа. Монгол Улсын 21 аймаг, нийслэлийг хамарсан төрийн албаны энэхүү шалгалтыг зохион байгуулахаар ажлын хэсэг байгуулж, ЗГХЭГ болон яамдын албан тушаалтнууд ойрын өдрүүдэд орон нутагт ажиллаж байгаа юм.

Төрийн албаны атестачлалын шалгалт явуулах зорилгоор хөдөө орон нутагт ажиллаж байсан ЗГ-ын авто баазын ланд 200 машин Солонготын даваанаас бууж байхдаа онхолдсон байна. Тус машинд явсан хүмүүсээс ЗГХЭГ-ын реферэнт Ганбат, сангийн яамны Ц нарын биеийн байдал тааруу байгаа юм байна. Өнөөдөр Улаанбаатар хотод авчирж эмчилгээ хийхээр ажиллаж байна гэдгийг албаны эх сурвалжаас мэдээллээ.

Энэ талаар бид Архангай аймгийн нэгдсэн эмнэлгийн мэс заслын эмч Чойжамцтай холбогдлоо. Тэрээр, "Осол болсон нь үнэн. Өнөөдөр өглөө 8.40 цагт Улаанбаатараас өвчтөнүүдийг авч явахаар нисдэг тэрэг ирсэн. Одоо Цахир сумын төвд байна. Ланд-200 автомашинд сууж явсан төрийн албаны дөрвөн хүн осолдсон. Дугуй нь буудсан учраас осолдлоо гэж хэлж байна лээ. Ослын шалтгааныг замын цагдаагийн албаныхан өгөх байх аа. Гурав нь нэлээд хүнд бэртсэн. Аминаас холуур гэж гэмтэл" гэсэн юм.