​ "Эцэг эхчүүдийн буруу хандлага залуу багш нарын зоригийг мохоодог"

Багшлах эрхийн гэрчилгээ олгох  болон гэрээт багш ажиллуулахтай холбоотой журмыг эцэслэн баталсныг энэ сарын 3-ны өдөр Боловсролын сайд П.Наранбаяр танилцуулсан. Журам батлагдсанаар гадаад, дотоодын их, дээд сургуулийг амжилттай төгссөн залуусыг богино хугацааны сургалтад хамруулан багшлах эрх олгож, болосролын салбарыг хүний нөөцийн хомдслыг шийдэх боломжтой гэж үзсэн юм.

Тус шийдвэртэй холбоотой олон асуудал хөндөгдөж, иргэд өөрсдийн байр сууриа илэрхийлээд буй. Тэгвэл тус салбарынхан буюу багш нар ямар байр суурьтай байгааг тодрууллаа.

Бага ангийн багш: “Академик боловсрол эзэмшсэн бол 45 хоногийн сургалтаар заах арга зүйг судлаад багшлах боломжтой. Мэдлэг хэрэгтэй ч сэтгэлээсээ зааж сургах нь чухал. Сэтгэлээсээ зааж чадахгүй бол энэ их ажлын ачаалал, бичиг цаас, стрессийг давж гарах хэцүү.

Сурлага сайтай сурагч нар багш мэргэжлийн сонгохгүй байна. Тэрэнд нь тохирсон хөшүүрэг хэрэгтэй гэж харж байна. Цалингийн асуудлыг шийдэж чадаагүйгээс үүдэн олон сайн багш нар ажлаа хаяж байна.

Ажлаа хийж байгаа багш нарыг дэмжээд өгөх эцэг эхчүүд оролцоо чухал байдаг. Эцэг эхчүүдийн буруу хандлага харилцаанаас үүдэн олон залуу багш нарын зориг нь мохдог. Тиймээс эцэг эхчүүд маань дэмжээд, ярилцаад ойлголцох шаардлагатай байна.

Манай сургуульд таван багшийн орон тоо дутуу. Хоёр ангид нэг багш давхар заагаад явж байна. Тиймээс ачааллыг бууруулах үүднээс төгсөх ангийн оюутан багшийг туслах багшаар ажиллуулж энэ асуудлаа шийдэж байна.” гэлээ.