Дэлхийн аялал жуулчлалын өдөр тохиож байна

Б. Пагамдулам

2 цагийн өмнө

Жил бүрийн есдүгээр сарын 27-ныг Дэлхийн аялал жуулчлалын өдөр болгон тэмдэглэдэг. Энэ өдөр аялал жуулчлалын салбарын нийгэм, эдийн засаг, соёлын хөгжилд оруулж буй хувь нэмрийг онцолдог.

Монгол Улсын аялал жуулчлалын салбарын өсөлтийг НҮБ-ын Аялал жуулчлалын байгууллага /UN Tourism/ онцолж, 2026 оны эхний хагас жилд олон улсын жуулчдын урсгал 39 хувиар өссөн дэлхийн өндөр өсөлттэй орнуудын нэгээр нэрлэжээ.

Мөн Монгол Улс аялал жуулчлалын салбарын өрсөлдөх чадварыг нэмэгдүүлэх, дижитал шилжилтийг эрчимжүүлэх хүрээнд Дэлхийн банкны санхүүжилттэй аялал жуулчлалын салбарын дижитал платформын төсөл хэрэгжүүлэхээр ажиллаж байна.

Тус төсөл нь дижитал технологи болон хиймэл оюуны шийдлийг аялал жуулчлалын салбарт нэвтрүүлж, салбарын үйлчилгээг илүү ухаалаг, хүртээмжтэй, тогтвортой болгоход чиглэх талаар Соёл, спорт, аялал жуулчлал, залуучуудын яамнаас мэдээлэв.

Монголд ирэх жуулчдын тоо 737 мянгад хүрчээ

Монгол Улсад 2026 оны есдүгээр сарын 1-ний байдлаар 737,338 жуулчин ирсэн байна. Энэ нь өмнөх оны мөн үеэс 258,886 жуулчнаар буюу 54.1 хувиар өссөн үзүүлэлт юм.

Сүүлийн дөрвөн жилийн эхний есөн сарын жуулчдын тоог харьцуулбал:

2023 он: 364,594
2024 он: 435,037
2025 он: 478,452
2026 он: 737,338

Ингэснээр 2026 онд Монгол Улсыг зорин ирсэн жуулчдын тоо 2023 оны мөн үеийнхээс хоёр дахин нэмэгджээ.

Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна

Шинэ мэдээ