“НАМРЫН НОГООН ӨДРҮҮД–2026” өргөтгөсөн худалдаа долоо хоног сунгалаа

Нийслэлийн хүн амын хүнсний тогтвортой хангамжийг бэхжүүлэх, дотоодын шилдэг бүтээгдэхүүнийг хэрэглэгчдэд хүргэх, борлуулалт болон зах зээлийн хүртээмжийг нэмэгдүүлэх зорилготой “Намрын ногоон өдрүүд–Үндэсний үйлдвэрлэл 2026” нэгдсэн үзэсгэлэн, өргөтгөсөн худалдаа үргэлжилж байна.

21 дэх жилдээ зохион байгуулж буй тус арга хэмжээнд 21 аймгийн үндэсний үйлдвэрлэл, газар тариалан, мал аж ахуй, хөнгөн үйлдвэрийн салбарын үйлдвэрлэгчид, жижиг, дунд үйлдвэрлэл эрхлэгчид оролцож, шинэ ургацын хүнсний ногоо, жимс жимсгэнэ болон дотоодын олон нэр төрлийн бүтээгдэхүүнийг худалдаалж байна.

Мөн нийслэлийн есөн дүүргийн 18 байршилд нийт 152 цэгт өргөтгөсөн худалдааг зохион байгуулж, тариаланч, ногоочдын гар дээрээс шинэ ургацын бүтээгдэхүүнийг хэрэглэгчдэд шууд хүргэж байна.

Үндсэн төвлөрсөн худалдаа – Төв цэнгэлдэх хүрээлэнд

Төв цэнгэлдэх хүрээлэнд 21 аймгийн брэнд бүтээгдэхүүн, дотоодын үйлдвэрлэгчдийн шинэ ургацын төмс, хүнсний ногоо, жимс жимсгэнэ зэрэг бүтээгдэхүүнийг дундын зуучлалгүй, үйлдвэрлэгчээс нь шууд худалдаалж байна.

Дүүргүүдэд – 152 цэгт

Нийслэлийн иргэдийг шинэ ургацын ногоогоор хүртээмжтэй хангах зорилгоор дүүрэг бүрийн нутаг дэвсгэрт тусгайлан тохижуулсан задгай талбай болон хороодын байршлуудад өргөтгөсөн худалдааг зохион байгуулж байна. Тухайлбал, Баянзүрх дүүргийн хороодын байршлуудад худалдаа явагдаж байна.

Анх энэ сарын 27-нд дуусахаар төлөвлөсөн “Намрын ногоон өдрүүд–Үндэсний үйлдвэрлэл 2026” өргөтгөсөн худалдааг тариаланч, ногоочдын хүсэлтийг харгалзан долоо хоногоор сунгахаар болжээ.