Европын аюулгүй байдал хамтын ажиллагааны байгууллагын төлөөлөл сэтгүүлч Н.Өнөрцэцэгтэй уулзлаа

Европын аюулгүй байдал хамтын ажиллагааны байгууллага (ЕАБХАБ)-ын Ардчилсан институт хүний эрхийн газраас  Монгол Улсын УИХ-ын 2024 оны ээлжит  сонгуулийн үйл ажиллагааг ажиглах олон улсын шинжээч, мэргэжилтнүүдээс бүрдсэн өргөн бүрэлдэхүүнтэйгээр ажиглахаар хороо байгуулсан. 

Тус байгууллагын үндсэн багийн гишүүн, хэвлэл мэдээллийн шинжээч Иван Годарски өнөөдөр /2024.06.06/ сэтгүүлч  Н.Өнөрцэцэгтэй биечлэн уулзжээ. Уулзалт гурван цаг орчим үргэлжилж,  сэтгүүлч Н.Өнөрцэцэгийн асуудалд анхаарч ажиллахаа илэрхийлсэн байна.

Энэ тухай сэтгүүлч Н.Өнөрцэцэг өөрийн сошиал хуудснаа "Европын аюулгүй байдал хамтын ажиллагааны байгууллага (ЕАБХАБ)-ын төлөөлөлтэй уулзаж, би гэдэг хүн ажлынхаа тухай ярилаа. Нийгмийг бүхэлд нь донсолгосон олон дарга нарын уурыг хүргэсэн сурвалжлагуудынхаа талаар мэдээлэл өглөө. 

Тухайлбал,

• Хөгжлийн банк 
• БЗС
•  Найман ишигний хэрэг
•   "Одоо зогс, дахиад өгөх амь алга" хэлэлцүүлэг
• Донор

зэрэг  өнгөрсөн хугацаанд хөндсөн мэдээлэл, сурвалжлагуудынхаа талаар дэлгэрэнгүй ярилаа. Үнэндээ нүд нь орой дээрээ гарч байна. Олон улсаар олон сэтгүүлч нартай уулзаж явсан, ийм олон сэдвээр ийм олон ноцтой асуудлыг хөнддөг сэтгүүлч нартай таарч байгаагүй гэдгийг хэлж байна. Мөн сэтгүүлчийн мэргэжлийн эрхийг хасдаг улстай ч таарч байгаагүй" гэлээ.Олон улсын байгууллагаас сонгууль ажиглахаар ирсэн.Миний асуудлаар хууль хяналтын байгууллагынхантай ч уулзана гэлээ. Сонгуулийн дараа ч ажиглалт үргэлжлэх юм байна. Монголын ардчиллын асуудлаар маш их сонирхож буй нь илт байна" гэжээ.

2024 оны УИХ-ын ээлжит сонгуулийн үйл явцыг хөндлөнгийн хараат бус ажиглагчид ажиглаж, дэлхий нийтэд нээлттэй мэдээлдэг уламжлалтай. Энэ удаагийн сонгуулийг гадаад улсын 11 шинжээчтэй хороо болон 250  мэргэжилтэн ажиглахаар ирнэ. Мөн гадаадын хэвлэл мэдээллийн байгууллагуудын сэтгүүлчид манай улсад ажиллах билээ.