ЗГ: Хөгжлийн банкнаас авсан зээлээ төлөөгүй 52 аж ахуйн нэгжийг АТГ-т шалгуулахаар шилжүүлсэн

Засгийн газрын ээлжит хуралдаанаар Хөгжлийн банкны чанаргүй зээлдэгч нарт арга хэмжээ авч ажиллах талаар хэлэлцэж,  хуулийн байгууллагуудын удирдлагуудад тодорхой чиглэлүүдийг өгчээ. Энэ үеэр Ерөнхий сайд хуулийн байгууллагыг бүхий л байдлаар дэмжихээ илэрхийлсэн байна. Уг асуудлаар Хууль зүй, дотоод хэргийн дэд сайд Б.Солонгоо мэдээлэл хийлээ. 

Тэрбээр "Хөгжлийн банк 2011 онд байгуулагдсан, төрийн зуун хувь өмчит банк. Хөгжлийн банкны онцлог бол хөгжлийн төсөл, хөтөлбөрүүдэд зээл хөтөлбөрийг санхүүжүүлэх зорилгоор, 2011 онд тусдаа бие даасан хуультайгаар байгуулагдсан. 2017 онд Хөгжлийн банкны шинэчилсэн найруулгын хуулийг баталснаар тус банкны үйл ажиллагаанд илүү бие даасан байдал бий болгох, цаашдаа засаглалыг сайжруулах чиглэлээр өөрчлөлт орж байсан. Өнөөдөр хүчин төгөлдөр мөрдөгдөж буй Хөгжлийн банкны хуулиар Хөглжлийн банк нийт санхүүжүүлэгчдийн дүнгийн дор хаяж 60 хувь нь  Монгол Улсын экспортыг дэмжсэн зээл олгох ёстой. Зориулалт нь хөгжлийг дэмжих, экспортыг нэмэгдүүлэх тодорхой төсөл, хөтөлбөрийг санхүүжүүллэх зориулалттай байгуулагдсан.

Сүүлийн үед банкны үйл ажиллагаа доголдсон, чанаргүй зээлийн үлдэгдлийн асуудал яригдаж байна. Өнөөдрийн мэдээллээр нийт 3.1 их наядын зээлийн багцнаас  55 хувь нь эрсдэлтэй буюу чанаргүй зээлдэгчид хамрагдах эрсдэлтэй байна. Үүнтэй холбоотойгоор нийт 28 зээлдэгчийн 1 их наяд орчим төгрөгийн зээлийг шүүхэд шилжүүлсэн. Мөн 14 зээлдэгчтэй холбоотой асуудлыг хууль хяналтын байгууллага шалгагдаж байна. Тухайлбал, АТГ-д 10, Эрүүгийн цагдаагийн газарт гэх зээлдэгчийг шалгаж байна.

Хөгжлийн банкнаас мэдээлснээр, шүүхийн шатанд мэдэгдэл гаргахад маш их хугацаа алдаж байгаа талаар мэдээлэл өгсөн. Хамгийн ихдээ нийт 69 сар шүүхэд маргаан шийдэгдэж байна. Мөн шүүхээр шийдвэр гарсан ч шүүхийн шийдвэр гүйцэтгэл дээр хугацаа алдаж байна.

Нэгдүгээр сарын 24-ны өдрөөс  хойш өнөөдрийг хүртэл 8.6 тэрбум төгрөгийн эргэн төлөлт хийгдсэн байна. Асуудалтай байгаа зээлийн хувьд 20 зээл буюу нийт 520 тэрбум төгрөгийн зээлийг зориулалтын бусаар зарцуулсан  байна. Эдгээр зээлдэгчийг хуулийн байгууллагуудтай хамтарч шалгуулна. Хуулиар Хөгжлийн банканд Монголбанкнаас жилд хоёр удаа, Засгийн газраас жилд нэг удаа шалгалт хийдэг.  Хөгжлийн банкнаас нэгдүгээр сарын сүүлээр 52 аж ахуйн нэгжийн зээлийг АТГ-д шалгуулахаар шилжүүлсэн.  Эдгээр ААН-ийг шалгаж эхэлсэн талаар АТГ-аас мэдээлэл өгсөн. Засгийн газрын зүгээс Хөгжлийн банкны үйл ажиллагааг цаашид дэмжиж ажиллаж, чанаргүй зээлүүдийг төлүүлж, ААН-үүдэд хариуцлага тооцно. Цаашдаа Хөгжлийн банкны үйл ажиллагаа улам өргөжиж, Монгол Улсын хөгжилд хувь нэмэр оруулах төсөл, хөтөлбөрүүдэд дэмжлэг үзүүлнэ. Эрх мэдэл, давуу байдал ашиглаж зээл авсан зээлдэгч нарыг шалгаж, хариуцлага тооцуулна. Ерөнхий сайд хуулийн байгууллагыг бүхий л байдлаар дэмжихээ илэрхийлсэн" гэв.