JCI Эко салбар байгууллагын “Залуу Ой” төсөл 8 дахь жилдээ

“JCI Эко” салбар байгууллагын санаачилгаар 2018 оноос хойш Богд хан уулын экологийн тэнцвэрт байдлыг хадгалах, унаган төрхөөр нь ирээдүй хойч үедээ үлдээх зорилго бүхий Дархан цаазат Богдхан уулаа хамгаалах үндэсний аян “Залуу ой” урт хугацааны төслийг санаачилсан. 

Энэхүү төсөл нь Богдхан уулын Их тэнгэрийн зүүн аманд шинэ залуу ойг үүсгэхээр Байгаль орчин, аялал жуулчлалын яам, Нэгдсэн үндэсний байгууллага, Богдхан уулын дархан цаазат газрын хамгаалалтын захиргаа, Монголын бурхан шашны төв Гандантэгчэнлин хийд болон JCI  Монгол байгууллагын гишүүд, дэмжигчдийн оролцоотойгоор өнөөдрийг хүртэл тасралтгүй 7 жилийн хугацаанд амжилттай хэрэгжиж, 2023 оноос “Тэрбум мод” үндэсний хөдөлгөөнтэй хамтарч, нийт  9000  гаруй модыг тарьж ургуулаад байна.

Богдхан уул нь Дэлхийн хамгийн анхны Дархан цаазат уул бөгөөд Богд хан уулын ой нь сэрүүн бүс Сибирийн ой тайгаас Төв Азийн хуурай хээр, говь, цөлийн бүсийн торгон зааг дээр ургадаг өвөрмөц тогтоцтой уул юм.

2025 оны төслийн нээлтээ 2025 оны 5 сарын 03-ны өдөр зохион байгуулж, 1500 ширхэг шинэс мод тарьж, нийт Богдхан уулын Их тэнгэрийн зүүн амны 5,5га газарт 2018 оноос хойш 10,000 модыг тарьж ургуулаад байна.

Төслийн нээлтэд:

Урилгаар: Богдхан уулын ДЦГ-ын хамгаалалтын захиргааны дарга, “Тэрбум мод” сан, Дотоод Их сургуулийн Шүүхийн Шийдвэр гүйцэтгэлийн сургууль, “Таван ухаан” шүдний эмнэлгүүдийн холбоо, “RE/MAX City”, Шүүхийн шийдвэр гүйцэтгэх ерөнхий газрын харьяа 401-р анги, Тарвилан хийд, “Gerelt activity studio” зэрэг 10 гаруй байгууллагын 150 гаруй сайн дурын залуучууд дэмжин оролцлоо.