Гамшиг, аюулт үзэгдэл, ослын улмаас 80 хүн амиа алджээ

УОК-оос гамшиг осол, хээрийн түймрийн нөхцөл байдлын ээлжит мэдээлэл өглөө. Он гарснаас хойш 2155 удаагийн гамшиг, аюулт үзэгдэл, ослын дуудлага бүртгэгдсэн байна. Улмаар 80 хүн амиа алдаж, 54 хүн гэмтэж урьдчилсан байдлаар 23.7 тэрбум төгрөгийн бодит хохирол учирчээ. Аюулт үзэгдэл, гамшгийн хор уршгийг арилгахад онцгой байдлын байгууллагаас давхардсан тоогоор 17545 аврагч, 3898 техник хэрэгсэлтэйгээр ажиллаж, 760 гаруй хүний амь насыг авран хамгаалж, тусламж үйлчилгээ үзүүлсэн байна. 184 тэрбум төгрөгийн хохирлоос урьдчилан сэргийлжээ. Ослын тохиолдын дийлэнх хувийг гал түймрийн дуудлага эзэлж байна. Нийт 1859 удаагийн гал түймрийн тохиолдол бүртгэгдсэнээс 1774 нь обьект, 85 нь ой хээрийн түймэр байна.

Газар хөдлөлт 25 удаа бүртгэгдсэн.Одоогоор сургуулийн дээвэр, байшингийн хана, тааз цуурсан гэдгээс өөр бодит хохирол учраагүй. Ус цаг уурын нөхцөл байдлаас шалтгаалсан гамшигт үзэгдэл гэвэл зам даваа хаагдаж, цасанд боогдох гэх мэт 38 дуудлага бүртгэгдсэн. Хүний үйл ажиллагаанаас хамааралтай 220 дуудлага бүртгэгджээ. Мал амьтны гоц халдварт өвчин 13 бүртгэгдсэн байна. 

ОБЕГ-ын Гал түймэртэй тэмцэх газрын дарга, дэд хурандаа П.Соронзонболд "Обьектын түймрийн улмаас он гарснаас хойш долоон иргэн амиа алдаж, утаажилтын бүсээс онцгой байдлын алба хаагчид 961 иргэнийг гаргасан. Өнгөрсөн оны мөн үеэс 40 гаруй хувиар өссөн байна. Ой хээрийн түймэр сүүлийн таван сарын хугацаанд 12 аймгийн 57 суманд 84 удаа бүртгэгдсэн. Энэ мөн өнгөрсөн оноос 45.7 хувиар өссөн үзүүлэлт юм" гэв.