ӨМӨЗО-д болсон жагсаалын үеэр 23 хүнийг баривчилжээ

БНХАУ-ын ӨМӨЗО-ны цагдаа нар монгол хэл дээрх сурах бичгийг хятадаар солих шинэ бодлогыг эсэргүүцсэн эсэргүүцлийн жагсаалын үеэр багадаа 23 хүнийг саатуулсан талаар “Time” онцолжээ. Өвөр Монголын таван хот, хошуудад монгол угсаатнууд жагсаж, Бээжингийн баримталж буй бодлогыг эсэргүүцэж буйгаа илэрхийлэн хүүхдүүдээ хичээлд нь явуулахгүй сургуулиудыг бойкот хийсэн. Мөн орон нутгийн засаг захиргаанаас ч өвөрмонголчуудад шахалт үзүүлж эхлээд байгаа юм.

Эрх баригчид Өвөр Монголыг төлөөлж буй Коммунист намын хоёр гишүүнийг цалингүйтүдгэл зүүлснээ өнгөрсөн бямба гарагт зарласан. Түүнчлэн Чифэн хотын цагдаа нар даваа гарагт Коммунист намын гишүүд, түүний дотор бага сургуулийн хоёр багшийг орон нутгийн намын сахилгын хороонд шалгуулахаар хүлээлгэн өгчээ. Өвөр Монголын нөхцөл байдлын талаарх мэдээллийг олж авахад хэцүү болсон талаар АНУ-д байрладаг Өмнөд Монголын Хүний эрхийн мэдээллийн төв, Монголын эрхийн төлөө тэмцэгч бүлэг онцолжээ. Учир нь, Хятадын Цагдаагийн газраас иргэдийн “Wechat”-д мөрдлөг хийж, нийгмийн сүлжээгээр жагсаал цуглаан зохион байгуулахыг уриалсан 129 хүнийг хайж байгаа аж.

Түүнчлэн 100-аас дээш хүнтэй эсэргүүцлийн жагсаалыг удирдсан хүний талаар баттай мэдээлэл өгсөн хүнд 1000 юань амлаад байна. Хятадын эрх баригч Коммунист нам / ХКН/саяхнаас Өвөр Монголын зарим хотод дунд сургуулиудын хичээлийг монгол хэлээр заадаг байсныг болиулж, зөвхөн хятад хэл дээр хичээлүүдээ үздэг болох шийдвэр гаргасан. Энэхүү алхам нь Хятадын үндэстний цөөнхөд эх хэлээр нь боловсрол олгох үйл явцыг зогсоох томоохон стратегийн нэг хэсэг, монгол соёл уламжлалыг устгахаар аажмаар чимээгүй довтолж буйн нэг хэлбэр гэдгийг судлаачид онцолж байгаа юм.

Шүүмжлэгчдийн үзэж буйгаар, Хятадын Засгийн газар исламын шашинт уйгаруудтай холбоотой асуудлаар олон улсын хүчтэй шүүмжлэлд өртөж буйгаа үл харгалзан үндэстний цөөнхийг уусгах ажиллагаагаа түргэвчилж байгааг энэ явдал харуулжээ. Шинэ бодлогыг олон нийт таагүй хүлээн авч байгаатай холбоотойгоор БНХАУ-ын эрх баригчид баасан гарагт гаргасан мэдэгдэлдээ Өвөр Монголын бүс нутгийн засаг захиргаа, үндэстний цөөнхүүд амьдардаг бүс нутагт үндэсний хэлийг бэхжүүлэх нь чухал гэдгийг онцолсоор байгаа юм.

https://time.com/5886711/china...