Хэргийн мөрөөр: Хоёр сурагчийн хамт явсан гэх газарзүйн багш Л нь өмнө нь хүчингийн хэрэгт шалгагдаж байжээ

Төв аймгийн Борнуур сумын нутаг дэвсгэрт өнгөрсөн шөнө буюу 00:51 цагийн орчимд автомашин онхолдож, 16 настай хоёр охин газар дээрээ амиа алдсан  хэрэг гарлаа.

Цагдаагийн байгууллагын урьдчилсан мэдээллээр, уг ослын улмаас хоёр сурагч амиа алдаж, нэг хүн гэмтсэн эмнэлгийн байгууллагад хүргэгдсэн гэх мэдээллийг өгсөн. Харин эх сурвалжийн мэдээлснээр, осолдсон автомашинд газарзүйн багш зорчиж явсан бөгөөд уг багш нь өмнө нь бага насны хүүхдийн эсрэг бэлгийн хүчирхийллийн хэрэгт шалгагдаж байсан гэх мэдээлэл байна.

Одоогоор хэргийн нөхцөл байдлыг тодруулахаар ажлын хэсэг гарган ажиллаж байна. Тодруулбал, аймгийн Хүүхдийн эрхийн улсын байцаагч ахлан ажиллаж байна.

Зариг сайтын сурвалжлах баг Төв аймгийн Борнуур суманд ажиллаж байгаа бөгөөд сумын сурагчдын дотуур байрны жижүүр багшаас тухайн орой болсон үйл явдал, сурагчид дотуур байрнаас яаж гарсан талаар тодрууллаа.

Тэрбээр “Өчигдөр миний оронд өөр жижүүрийн багш ажиллаж байсан. Өглөө 09:00 цагт ээлжээ хүлээж авахад ийм харамсалтай мэдээллийг дуулсан. Манай дотуур байр 19:00 цагт хаалгаа барьж, орой хүүхдүүдийн ирц, тоог авдаг. Тоо авсны дараа хүүхдүүд өөрсдөө цонхоор гараад явсан гэх мэдээлэл байна. Гурван охиныг дагуулж явсан гэх багш өмнө нь манай суманд ажилладаг байсан. Энэ хүн миний 13 настай охиныг хүчирхийлсэн гэх хэрэгт холбогдсон. Гэвч өнөөдрийг хүртэл хэрэг нь шийдэгдэлгүй явсаар байтал одоо хоёр охины амь нас хохирлоо” хэмээн ярьжээ.