Ѳчигдѳр буюу энэ сарын 4- ны ѳдѳр хэвлэл мэдээллийн хуудаснаа "Ѳргѳѳ" амаржих газрын нярайн аппарат алдагджээ гэх мэдээлэл цацагдаж эхэлсэн талаар бид мэдээлсэн. Уг хэргийн талаар тодруулбал, 2018 оны 11 дүгээр сарын 7-ны өдөр Нийслэлийн "Ѳргөө" амаржих газрын дарга Г.Баясгалан нь цагдаагийн байгууллагад хандан эмнэлгийн тоног тѳхѳѳрѳмж алдагдсан гэх мэдээллийг ѳгчээ.
Мэдээллийн дагуу Сүхбаатар дүүргийн цагдаагийн нэгдүгээр хэлтсийн алба хаагчид мѳрдѳн шалгах ажиллагааг явуулсан байна. Шалгалтаар Ѳргѳѳ амаржих газрын алдагдсан гэх тоног тѳхѳѳрѳмжийг тус эмнэлгийн нярайн тасгийн эрхлэгч О нь ѳѳрийн хувийн эмнэлэгтээ ашиглаж байсан нь тогтоогдсон байна. Хэрэгт холбогдогч О нь хувийн эмнэлэгтэй бѳгѳѳд ѳѳрийн ажилладаг Ѳргѳѳ амаржих газраас нярайн тасагт хэрэглэж байсан дѳнгѳж тѳрсѳн нярайн шарлагын фото аппарат нэг ширхэг, нярайн ор, тэргэнцэр гэх мэт шаардлагатай тоног тѳхѳѳрѳмж, хэрэглэлүүдийг ѳѳрийн дур мэдэн ашиглаж байжээ.
Ѳргѳѳ амаржих газрын дарга Г.Баясгалан анх цагдаагийн байгууллагад хандан дуудлага мэдээлэл ѳгѳхдѳѳ: "Манай байгууллагын нярайн тасгийн тоног төхөөрөмжүүд алга болсон байна". Манай байгууллага энэ оны зургаадугаар сард эмнэлэгийнхээ бүх тоног төхөөрөмжийг тоолсон. Тухайн тооллого хийх үед эмнэлгийн тоног тѳхѳѳрѳмж бүгд бүрэн бүтэн байсан. Гэтэл аравдугаар сард дахин тооллого хийхэд ѳмнѳ нь байсан хэд хэдэн аппарат алга болсон байсан хэмээсэн байна.
Харин эх сурвалжийн мэдээлж буйгаар О нь ѳөрийн хувийн эмнэлэгтээ нярайн фото аппарат, нярайн тэргэнцэр зэргийг хэрэглэж байсан үнэн. Гэхдээ би дарга нартаа хэлж зөвшөөрөл авсан байсан. Одоо гэхдээ буцаагаад өгчихсөн хэмээж байсан аж.
Мѳрдѳн шалгах ажиллагааны явцад уг хэрэгт хохирогчоор тус эмнэлэгийн санхүү аж ахуйн албаны дарга Батдаваа гэх хүнийг хохирогчоор тогтоожээ. Харин гэмт хэргийг үйлдсэн байж болзошгүй тус эмнэлгийн нярайн тасгийн эрхэлэгч албан тушаалтай байсан гэх О-г холбогдуулан шалгаж байгаа юм байна.
Энэхүү хэрэгт холбогдуулан шалгагдаж эхэлснээс хойш тус эмнэлгийн зүгээс О-ийн албан тушаалыг бууруулж тасгийн эрхлэгчийн ажлаас чөлөөлж цалин хасах арга хэмжээнүүдийг хүртэл авчээ.
Зарим хэвлэл мэдээллийн хэрэгслээр актлагдсан, хэрэглэж болохгүй тоног тѳхѳѳрѳмжийг хувийн эмнэлэгтээ ашиглаж байсан гэх мэтээр мэдээлж байсан. Гэтэл эмнэлэгт цѳѳхѳн байдаг нярайн зайлшгүй шаардлагатай гэх хэрэгслүүдийг ѳѳрийн хувийн эмнэлэгтэй хэрэглэж байсан аж.
Сүүлийн саруудад ѳвлийн улирал эхэлж буйтай холбогдуулан эхээс дѳнгѳж тѳрсѳн нярай хүүхдүүд биологийн шарлалт ихтэй тѳрж байгаа гэх мэдээлэл хѳвѳрсѳѳр байсан билээ. Гэтэл тѳрѳх эмнэлгүүдийн хэт ачааллын улмаас нярайн тѳхѳѳрѳмж тѳдийлѳн хүрэлцэхгүй байгаа тухай мэдээлж байсан. Гэтэл нярай хүүхдэд нэн шаардлагатай, актлагдаагүй байсан аппратыг хувьдаа ашигласан байх юм.
Энэ талаар Ѳргѳѳ амаржих газраас тодруулахад: Ийм хэрэг гарсан нь үнэн.Гэхдээ байгууллагын дотоод асуудал учраас нэмэлт мэдээлэл ѳгѳх боломжгүй гэсэн хариулт ѳгсѳн юм.
Сэжигтэн О-г эрүүгийн хуулийн тусгай ангийн 17 дугаар бүлэгт зааснаар Өмчлөх эрхийн эсрэг гэмт хэрэгт холбогдуулан шалгаж байгаа юм. Энэхүү хэргийн мѳрдѳн шалгалтын ажиллагаа үргэлжлэн Сүхбаатар дүүргийн цагдаагийн нэгдүгээр хэлтэст явагдаж байна.
medee.mn
Улаанбаатар °C 
Сэтгэгдэл (0)
Сэтгэгдэл бичигдээгүй байна