ХӨВСГӨЛД СУРАГГҮЙ БОЛСОН ХЯТАД ИРГЭДИЙГ ХАЙХААР НИСЛЭГ ҮЙЛДЭХЭЭР БОЛЖЭЭ

Хөвсгөл аймгийн Алаг-Эрдэнэ сумын Хатгал тосгонд БНХАУ-ын харьяат иргэн М /25 настай эрэгтэй/, иргэн Г /28 настай эмэгтэй/ нар аравдугаар сарын 18-ны өдөр ууланд гурав хоног аялаад ирнэ гэж яваад сураггүй алга болсон тухай дуудлага аравдугаар сарын 25-ны өдрийн 01:02 цагт тус аймгийн Онцгой байдлын газарт ирсэн.

Дуудлага мэдээллийн дагуу 16 алба хаагч, Цагдаагийн газрын 11 алба хаагч, Хилийн 0275 дугаар ангийн арван алба хаагч, Хатгал тосгоны Захирагчийн ажлын албаны дөрвөн ажилтан, ар гэрийн Хятад улсын долоон иргэн, нийт 48 хүн, долоон автомашин, 13 морьтойгоор, дөрвөн бүлэгт хуваагдан хайж эхэлсэн ч үр дүнд хүрээгүй байдаг.

Улмаар өнөөдөр 08:00 цагт эрэн хайх ажиллагааг дахин эхлүүлсэн байна. Эрэн хайх ажиллагаатай танилцах, удирдлага зохион байгуулалтаар хангах зорилгоор Гамшгийн шуурхай удирдлагын газрын дарга, хурандаа Б.Мандахгэрэлээр ахлуулсан ОБЕГ-ын хоёр, Үндэсний аврах бригадын дөрвөн алба хаагчийн бүрэлдэхүүнтэй ажлын хэсэг Зэвсэгт хүчний 303 дугаар ангийн МИ-8 нисдэг тэргээр Хөвсгөл аймгийн Алаг-Эрдэнэ сумын Хатгал тосгоны чиглэлд нислэг үйлдэнэ.