ОН ГАРСААР 1973 УДААГИЙН ГАЛ ГАРСНЫ 25 ХУВЬ НЬ БАЯНЗҮРХ ДҮҮРЭГТ БҮРТГЭГДЖЭЭ

Нийслэлийн хэмжээнд өнгөрсөн онд 2266 удаагийн гал гарсан бол энэ оны 10 сарын байдлаар 1973 удаагийн гал гарч, галын улмаас 46 хүн амь насаа алджээ. Эдгээр түймрийн хамгийн их нь буюу 25 хувь нь Баянзүрх дүүрэгт гарсан байна.

Хүйтний улирал эхэлж, обьектын гал түймрийн тоо, давтамж сүүлийн үед нэмэгдэж байгаатай холбогдуулан болзошгүй гал түймрийн аюулаас урьдчилан сэргийлэх, эрсдэлийг бууруулах зорилгоор "Гал түймрийн аюулаас урьдчилан сэргийлэх нэгдсэн арга хэмжээ"-г Баянзүрх дүүрэгт зохион байгуулжээ.

Нийслэлийн онцгой байдлын газар, Баянзүрх дүүргийн Засаг даргын тамгын газартай хамтран явуулсан уг сургалтыг тус дүүргийн 8, 9, 12 дугаар хорооны айл, өрхөд хяналт шалгалтыг зохион байгуулж, иргэдэд галын аюулгүй байдлыг хангах, гал түймрээс урьдчилан сэргийлэх талаар зөвлөмж өгсөн байна.

Хоёр өдөр үргэлжилсэн нэгдсэн арга хэмжээгээр иргэдэд болзошгүй аюулаас өөрийгөө болоод гэр бүлээ авран хамгаалах чадвар эзэмшүүлэх сургалтуудыг зохион байгуулсан гэж Нийслэлийн онцгой байдлын газраас мэдээллээ