ХҮЧИРХИЙЛЛИЙГ ХҮЧГҮЙДҮҮЛЭХ ОЛОН НИЙТИЙН ХӨДӨЛГӨӨН ӨРНҮҮЛНЭ

Статистикийн мэдээгээр Монгол Улсын хүн амын 50.84 хувь эмэгтэйчүүд байдаг аж. Үүнээс 78000 гаруй эмэгтэй өрх толгойлон амьдарч, хагас болон бүтэн өнчин 37000 хүүхэд өсч байна.

Эдгээр тоон мэдээллийн цаана нуугдаж байгаа "Гэр бүлийн хүчирхийлэл" хэмээх нийгмийн сөрөг үзэгдэлд бүх нийтээрээ анхаарал хандуулахыг Монголын эмэгтэйчүүдийн холбооноос уриалж, "Хүчирхийллийг хүчгүйдүүлэх олон нийтийн хөдөлгөөн"-ийг өрнүүлж байгаа талаар өнөөдөр мэдээлэл хийлээ.

Тодруулбал,"Монголын эмэгтэйчүүдийн холбоо" санаачлан Монголын өмгөөлөгчдийн холбоо, Нийслэлийн гэмт хэргээс урьдчилан сэргийлэх зөвлөл хамтран "Хүчирхийллийг хүчгүйдүүлэх олон нийтийн хөдөлгөөн"-ийг өрнүүлж байгаа аж.

Монголын эмэгтэйчүүдийн холбооны ерөнхийлөгч Б.Оюунгэрэл "Хүчирхийлэл газар авч хүний эрх тэр тусмаа хүүхэд, эмэгтэйчүүдийн эрх ноцтой зөрчигдсөөр байна. Гарынхаа чадал булчингийнхаа бядыг хүүхэд, эмэгтэйчүүдэд гаргаж бахаа хангаж хүслээ гүйцээж суугаа араатнуудтай тэмцэх цаг хэдийнэ болжээ.

Гэр бүлийн хүчирхийлэлийн 86 хувь нь эр нөхрийнхөө хүчирхийлэлийг нуудаг харин 14 хувь нь хүчирхийлэлийг тэсдэггүй хэн нэгэнд хэлдэг гэсэн судалгаа бий. Иймээс хүчирхийллийг хүчгүйдүүлэх олон нийтийн хөдөлгөөнд таныг, та бүхнийг нэгдэхийг уриалж байна. Өөрөөсөө, ойр дотноосоо, хөрш айлдаа, хөндлөнгийн хүмүүст ч хамаагүй сайн сайхнаар хандаж саар бүхнийг мэдээлж тусч хүнлэг байх нь энэхүү хөдөлгөөний эхлэл юм. Хүчирхийллийг хүчгүйдүүлэхэд та хэн ч бай ирээдүйн сайн сайхны төлөө энхрий бяцхан үрс, элбэрэлт сайхан ээжүүдийн төлөө, элэг бүтэн амьдралын төлөө нийгмийн төлөө яг одоо нэгдээрэй" гэлээ.