НИЙТИЙН ТЭЭВРИЙН БАЙГУУЛЛАГУУД ӨРСӨЛДӨНӨ

Нийслэлийн тээврийн газраас нийтийн тээврийн үйлчилгээ эрхлэгч аж ахуй нэгж, байгууллагуудын дунд болзолт уралдаан зарлажээ. Тус уралдааныг тээврийн үйлчилгээний чанар, соёлыг сайжруулах, аж ахуйн нэгж, байгууллагад тавигдах стандартын шаардлага, гэрээний үүргийн биелэлт, сахилга хариуцлагыг дээшлүүлэх зорилготойгоор хоёр дахь жилдээ зохион байгуулж буй юм.

Уралдаан нь энэ сарын 22-ноос ирэх арванхоёрдугаар сарын 14-ний өдөр хүртэл явагдах бөгөөд нийтийн тээвэр болон хот орчмын 18 чиглэлийн ААН, такси үйлчилгээний арван ААН хамрагдах аж. Оролцогчдыг:

-Үйлчилгээний чанар, соёл, тээврийн хэрэгслийн өнгө үзэмж, цэвэрлэгээ бүрэн бүтэн байдал,

-Хөдөлгөөний аюулгүй байдал, замын хөдөлгөөнд оролцох, дүрэм журмын хэрэгжилтийг харгалзах

-Иргэдээс ирүүлсэн үйлчилгээний санал хүсэлт зэргийг үндэслэн эдгээр гурван шалгуураар дүгнэж, хариуг гаргах аж.

Уралдааны дүнг шалгаруулахдаа нийтийн тээврийн үндсэн үйлчилгээ эрхлэгч ААН-ээс эхний дөрвөн байр, такси үйлчилгээнээс эхний гурван байрыг шалгаруулж тус бүр мөнгөн шагнал дагалдуулах юм байна. Хангалтгүй үнэлгээ авсан ААН, байгууллагыг холбогдох хууль журмын дагуу арга хэмжээ авч, хугацаатай үүрэг даалгавар өгч зөрчлийг арилгуулах ажээ.