МОНГОЛ БҮСГҮЙЧҮҮДТЭЙ ЗУГААЦСАН ТЭНГИСИЙН ЦЭРГИЙН КОМАНДЛАГЧИД ЯЛ ОНООЖЭЭ

Өнгөрсөн баасан гариг (2018.10.19)-т АНУ-ын Калифорни мужийн өмнөд тойргийн шүүхээс тус улсын тэнгисийн цэргийн командлагч асан, 51 настай Трой Амундсонд 30 сар шоронд хоригдох, дараа нь гурван жил хяналтад байх, мөн 250 мянган ам.долларын нөхөн төлбөр төлөх ял оноосон талаар "Justice news"-т мэдээлсэн байна.

Номхон далайн флотод алба хаах хугацаандаа тэрээр Сингапурт байрлалтай Glenn Defence Marine Asia (GDMA) компаниас авлига авч, хариуд нь армид эд материал нийлүүлэх олон саяын дүнтэй гэрээ байгуулсан. Мөн арав орчим жилийн хугацаанд тус компаниас зөвхөн мөнгө аваад зогсохгүй тансаглал, зугаа цэнгээний зардлаа гаргуулж, биеэ үнэлэгчдээр үйлчлүүлдэг байсан нь тогтоогджээ.

Амундсон өөрийн болон бусад офицеруудынхаа үнэтэй дарс, зоог, унаа, үдэшлэг, аялал зугаалга, биеэ үнэлэгчдийн зардлыг GDMA компаниар төлүүлснийхээ хариуд армийн бэлтгэн нийлүүлэлттэй холбоотой нууц мэдээ материалыг дамжуулдаг байсан аж.

Шүүх хурал дээр АНУ-ын Хууль зүйн яамнаас гаргасан мэдэгдэлд GDMA компанийн захирал Леонард Глэн Франсист илгээсэн Амундсоны нэгэн цахим шууданг дэлгэжээ. Тус шууданг илгээснийхээ дараа Амундсон Монголоос ирсэн хэд хэдэн биеэ үнэлэгчдээр үйлчлүүлж байсныг тус мэдэгдэлд өгүүлсэн байна. Амундсоны буруутайг 2015 онд тогтоож, өнгөрсөн хугацаанд уг хэрэгт холбогдолтой 33 хүнийг шалгаж, зохих шийтгэлийг оноожээ