ХАНАРУ ДЭЛГҮҮРЭЭС ХУГАЦАА НЬ ДУУССАН 45 НЭР ТӨРЛИЙН БАРАА ИЛЭРЧЭЭ

Нийслэлийн мэргэжлийн хяналтын газраас хугацаа нь дууссан хүнсний бүтээгдэхүүний хаяг шошгыг засварлаж, худалдаанд гаргаж байсан "Ханара" дэлгүүрийн талаар өнөөдөр /2018.10.17/ сэтгүүлчдэд мэдээлэл хийлээ. Нийслэлийн мэргэжлийн хяналт болон Сүхбаатар дүүргийн мэргэжлийн хяналтын улсын байцаагчид иргэнээс ирсэн гомдлын дагуу Сүхбаатар дүүргийн V хороо, Голомт хотхонд байрлах "Ханару" дэлгүүрт шалгалт хийжээ. Шалгалтаар хугацаа нь дууссан 45 нэр төрлийн 22 сая төгрөгийн бараа илэрснийг, битүүмжилсэн байна. Мөн хаяг шошгын зөрчилтэй 41 төрлийн 11 сая төгрөгийн бараа бүтээгдэхүүнийг битүүмжилжээ.

"Ханара март" ХХК нийт БНСУ-аас дөрвөн удаагийн таталт хийсэн байна.

• Нэгдүгээр сарын 12-ны өдөр 24 нэр төрлийн 20.3 тонн
• Дөрөвдүгээр сарын 12-нд 27 нэр төрлийн 19.9 тонн
• Зургаадугаар сарын 18-нд 31 нэр төрлийн 21.3 тонн,
• Есдүгээр сарын 7-нд 24 нэр төрлийн 19.7 тонн, нийт 106 нэр төрлийн 81.2 тонн бараа бүтээгдэхүүнийг БНСУ-аас татан авчээ.

Тухай бүрт нь гааль болон мэргэжлийн хяналтын байгууллагаар шалгуулж оруулж ирсэн байна. Энэхүү оруулж ирсэн бүтээгдэхүүн дунд хаяг шошгын зөрчилтэй, чанарын шаардлага хангахгүй, хугацаа нь дууссан зүйл илрээгүй байна. Тиймээс энэхүү компани нь зөрчилтэй бүтээгдэхүүнийг хэрхэн оруулж ирснийг тогтоохоор хуулийн байгууллагад хандаж шалгуулахаар шийдвэрлээд байгаа аж. "Ханна Март" ХХK-ийн "Ханару" дэлгүүрт шалгалт хийж, илэрсэн зөрчлийн дагуу Зөрчлийн тухай хуулийн 11.2 дугаар зүйлийн 1.2 дахь заалтын дагуу дотоод хяналт шалгалтын журам тогтоож мөрдүүлээгүй тул 1000 нэгж буюу 1 сая төгрөгийн шийтгэвэр ногдуулжээ

Нийслэлийн мэргэжлийн хяналтын газраас "Ханару" дэлгүүрийн болон Баянгол дүүргийн нэгдүгээр хороонд байрлах агуулахын үйл ажиллагааг түр зогсоожээ. Зөрчлөө арилгасан тохиолдолд дахин үйл ажиллагаагаа эхлэх боломжтой юм байна. Шалгалт хийгдэхээс өмнө тараагдсан бараа бүтээгдэхүүнийг тухайн аж ахуй нэгжийн санхүүгийн баримтыг нь авч, "Ханару" дэлгүүрээс худалдан авсан бараа бүтээгдэхүүнийг хоол хүнсэндээ хэрэглэхгүй байхыг иргэдэд анхааруулж, тухайн бүтээгдэхүүнийг буцаан татах ажлыг хийж байна.

Одоогоор "Ханару" дэлгүүрээс худалдан авсан бүтээгдэхүүний улмаас биеийн байдал муудсан мэдээлэл ирээгүй бөгөөд тус дэлгүүрээс худалдан авсан бүтээгдэхүүнээ мэргэжлийн хяналтын байгууллагад хүлээлгэн өгөхийг сануулав.