С.ЗОРИГИЙН АМИЙГ ХӨНӨӨСӨН ХЭРГИЙГ НЯГТЛАХ ТҮР ХОРОО БАЙГУУЛАХААР БОЛЖЭЭ

Төр нийгмийн зүтгэлтэн Ардчилсан хувьсгалчдын анхдагч С.Зоригийг хөнөөсөн хэрэгтнүүдийг илрүүлсэн ч захиалагчийг нь олохгүй байгаа нь олон нийтийн дунд эргэлзээ төрүүлсэн хэвээрээ байна.Хэргийн захиалагчийг олж олон нийтэд зарлах асуудал УИХ-ын хэмжээнд хүртэл яригдсаар байгаа. Тэгвэл УИХ-аас С.Зоригийн амийг хөнөөсөн хэргийг нягтлах Түр хороо байгуулах болсон талаар УИХ-ын гишүүн Л.Болд ярьжээ.

Тэрбээр "Олон улсын парламентын холбооноос ирсэн хүсэлтийн дагуу санал, дүгнэлт гаргах ажлын хэсгийг Х.Нямбаатар гишүүнээр ахлуулан байгуулсан. С.Зориг агсны хэргийн материалыг нууцаас гаргасан гэх боловч зарим хэсгийг нь нууж байгаа. Нууцалж буй зарим материалыг үзэж болохгүй байна. Тэр нууц материалыг үзэх эрх нь Тусгай хяналтын хороонд бий. Энэ дагуу Тусгай хяналтын хороонд чиглэл өгч ажиллаж байгаа. УИХ Түр хороо байгуулаад аливаа асуудлаар санал, дүгнэлт гаргах ёстой" гэжээ