ЭНХИЙГ САХИУЛАГЧИД АФГАНИСТАН УЛСЫГ ЗОРИНО

Афганистан улсад явагдаж буй "Шийдвэртэй дэмжлэг" ажиллагаанд үүрэг гүйцэтгэх дэд хурандаа С.Бат-Эрдэнэ захирагчтай цэргийн баг Жанжин туганд хүндэтгэл үзүүллээ.

Энэхүү ёслолын ажиллагаанд Батлан хамгаалахын дэд сайд Т.Дуламдорж, ЗХЖШ-ын орлогч дарга, хошууч генерал Ж.Бадамбазар болон БХЯ, ЗХЖШ, ХЗЦК, АЦК-ын удирдлагууд, үүрэг гүйцэтгэх цэргийн алба хаагчид, тэдний ар гэрийн төлөөлөл оролцсон байна.

Ажиллагааны газар орныг зорих дайчдад хандаж Батлан хамгаалахын дэд сайд Т.Дуламдорж хэлэхдээ, "Эх дэлхийн энх тайван, тусгаар тогтнолын төлөө, төр засгийнхаа итгэл найдварыг тээн алс хол үүрэг гүйцэтгэх цэргийн алба хаагчид та бүхэндээ хамгийн сайн сайхан бүхнийг хүсэн ерөөе. Манай дайчид энхийг сахиулах үүргээ нэр төртэй гүйцэтгэж, эх орон, Зэвсэгт хүчнийхээ нэр хүндийг дэлхий дахинаа цуурайтуулна гэдэгт итгэлтэй байна" гэжээ.

Жанжин тугандаа мэхийн ёсолсон цэргийн алба хаагчдаа төлөөлж тус цэргийн багийн захирагч, дэд хурандаа С.Бат-Эрдэнэ эх орныхоо өмнө хүлээсэн үүргээ нэр төртэй биелүүлж, Монгол Улс, Зэвсэгт хүчний нэр хүндийг өндөрт өргөнө гэдгээ илэрхийлэв. Монгол Улсын Зэвсэгт хүчний цэргийн алба хаагчид удахгүй ажиллагааны газар орныг зорих юм.