ШАТАХУУНЫ ҮНЭ НЭМЭГДСЭН ГЭХ СУРГААР ШТС-ИУДЫН АЧААЛАЛ ИХЭСЧЭЭ

Энэ он гарсаар шатахууны үнэ гурван удаа нэмэгдлээ. Орон нутагт АИ-92 шатахууны үнэ 2010 төгрөгт хүрсэн бол нийслэлд ч захын хороололоор ийм үнээр худалдаж, зарим газар бүр 2030 болсон байна гэх мэдээллийг ард иргэд тараагаад байна.

Өчигдөр АМГТГ-аас шатахууны үнэ нэмэгдэж буй шалтгаанаа тайлбарласан бөгөөд бараг л нэмэгдэх нь зөв гэсэн ойлголтыг олон нийтэд өгсөн юм.

Тэгвэл нийслэлийн захын хороололд шатахууны үнэ үнэхээр нэмэгдсэн юмуу. СХД-ийн 22 дугаа хорооноос цаашхи ШТС-иудын өнөө өглөө гэхэд нэмэгдээгүй харагдав. Тухайлбал, Петровис АИ-92 1850, Монсуль АИ-92 1780, Содмонгол 1850, Магнай трейд 1880 төгрөгийн үнэтэй харагдав.

Харин өчигдөр Нийслэлийн төвд байрлах ШТС-иудын ачаалал эрс нэмэгдсэн талаар түгээгчид хэлж байв.
Энхтайваны гүүрний доор байрлах Петровис ШТС дээр машинууд урт дараалал үүсгэсэн байв.

Түгээгчийн хэлснээр "Хүмүүс шатахууны үнэ нэмэгдэж байна. Одоо нэмэгдэж 2000 болохоос нь өмнө шатахуунаа дүүргэж авъя гээд оочер дараалал их байна. Хоорондоо хэрэлдээд дайраад байх юм. Шатахууны үнэ нэмэх эсэх талаар одоо бидэнд мэдэгдээгүй байна. Цаашид яахыг бид мэдэхгүй, дээрээс буюу удирдлагууд шийднэ" гэв