ДЭЭД ШҮҮХЭЭС Л.ПҮРЭВБААТАРЫН 1.5 ТЭРБУМЫН ХАУСЫГ “УЛААНБААТАР ТӨМӨР ЗАМ”-Д ШИЛЖҮҮЛЭХ ШИЙДВЭР ГАРГАЛАА

УБТЗ-ын дарга асан Л.Пүрэвбаатарт холбогдох хэргийг өчигдөр Дээд шүүх эцэслэн дэнслэв.Өнгөрсөн дөрөвдүгээр сард Нийслэлийн давж заалдах шатны шүүхэд УБТЗ-ын дарга асан Л.Пүрэвбаатарт холбогдох хэргийг шүүх хурал болж, түүний эзэмшиж байгаа 1.5 тэрбум төгрөгийн үнэтэй хаусыг УБТЗ-ын мэдэлд буцаан олгох шийдвэрийг гаргасан. Энэхүү шийдвэрийг эсэргүүцэж Л.Пүрэвбаатар нь Дээд шүүхэд гомдол гаргасан байсныг өчигдөр хэлэлцэв.

Дарга асан Л.Пүрэвбаатар нь УБТЗ-ын даргаар хоёр жил ажиллахдаа УБТЗ ХНН-ын хөрөнгөөр хувьдаа Зайсанд 1.4 тэрбум төгрөгийн үнэтэй хаус захиалан бариулж эзэмшиж байгааг ""УБТЗ" ХНН хууль бус үйлдэл хэмээн үзэж шүүхэд ийнхүү гурван шатны шүүхэд хандаж, эцэстээ ялагдав.
Дээд шүүхээс түүний Зайсан дахь 1.4 тэрбум төгрөгийн үнэтэй хаусыг УБТЗ-д шилжүүлэх шүүхийн тогтоол гаргажээ. Одоо шүүхийн шийдвэрийг Л.Пүрэвбаатар биелүүлж, үнэтэй байраа суллаж өгөх ёстой.

Шүүхийн шийдвэрийн дараа Л.Пүрэвбаатар "УБТЗ-ын дарга байсан хүнд төр хатуу хандлаа. Үе үеийн дарга нар ч үнэтэй орон сууцтай байсан. Одоогийн дарга ч үнэтэй орон сууцанд амьдарч байгаа шүү. Байр орон сууцны асуудлаар бие биенээ дарамталж, улстөржих шаардлага байхгүй баймаар юм. Шүүхийн шийдвэрт гомдолтой байна" гэжээ