Б.Сарантуяа: Эрэгтэйчүүд даавуу, эмэгтэйчүүд торгон дээл сонгож байна

Үндэсний их баяр наадам болоход 10 хоног үлдлээ. Монголчууд эртнээс өвлөгдсөн уламжлал, өв соёлыг хадгалсан наадмаараа үндэсний хувцсаараа гоёдог. Тиймээс JBRAND-ийн худалдааны зөвлөх Б.Сарантуяатай ярилцлаа. 

-Наадам болоход цөөхөн хоног үлдээ. Энэ жилийн ямар өнгө, загварын дээл эрэлттэй байна вэ? 

-Нэг үе хүмүүс хос дээлээр гоёдог байсан бол одоо өнгө ижилссэн дээл их сонгох болжээ. Ингэхдээ эрэгтэйчүүд даавуу, эмэгтэйчүүд торгон дээл сонгож байна. Загварын тухайд манайд хүрээ дээл гаргаж байсан юм. Харин энэ жил шинэ загварын өлзий хээтэй тод өнгийн дээл гаргаж байгаагаа дуулгахад таатай байна. Хүрээ загвар нь хормой нь дэрвэгэр байдаг онцлогтой. Харин энэ жил гаргасан дээлээрээ хормойг нь багасгасан байгаа. Өнгөний тухайд өмнө жилтэй адил ногоон өнгө эрэлттэй байна. Мөн тод өнгийн дээл их сонирхох болсон. Өөрийн хүсэл сонирхол, биеийн онцлогтоо тохируулж дээл худалдаж авдаг. Хэвлий хэсгээрээ тарган хүмүүс мөртэй загвар тохиромжгүй. Харин монгол загварын дээл өмсөх нь зөв. 

Охидын монгол цамц, цэвэр даавуун үндэсний загвартай плаж худалдаалж байна. Нимгэн цамц, трико дээр хослуулж өмсөх боломжтой. 

-Танай брэнд эрэгтэй, эмэгтэй бүх гоёл худалдаалдаг. Үнийн ханшийн талаар мэдээлэл өгөхгүй юу? 

-Эрэгтэй дээл 450-480 мянга. Малгай, дээл, бүс нийлээд сая хүрэхгүй хаа ч байхгүй хямд үнэтэй байна. Эмэгтэй дээл материал, хийц, загвараасаа хамаараад үнэ нь өөр. Манай дээлүүд даавуун утастай торго.Тухайлбал, хүр хормойн материалтай дээл 850 мянга. Өмнө нь загварын дээл гардаг байсан. Харин одоо эргээд монгол дээл рүүгээ шилжсэн байх жишээтэй. Эмэгтэй хүрээ дээл 580 мянгаар худалдаалдаг байсан бол наадмын хямдрал зарлаад 500 мянга болгосон. Нэг удаа дээл авсан байхад бүх цаг үед гоёх боломжтой. Хадгалалт, арчилгааг нь зөв хийвэл дээл олон жил өмсөгдөнө. 

-Эрэгтэй хүмүүс тренд хөөдөг үү. Өнгөнд хэр ач холбогдол өгдөг вэ? 

-Эрэгтэйчүүд дээл сонгож авахдаа өнгө нь зохиж байвал шууд сонгоно. Өмсөж үзээд биед тухтай байдлыг эрхэмлэдэг. Залуучуудын хувьд сонины цаастай зүйрлэмээр өвөрмөц материалтай дээл асуух нь бий. 

-Сүүлийн үед дээл дээр өнгө бүс бүсэлдэг болжээ. Өргөн бүс нь ямар ач холбогдолтой вэ? 

-Дээлийн бүс өргөн олон ороодог байх нь зохимжтой. Энэ нь эмэгтэй хүний гэдэг хэсгийг дараад сайхан харагддаг. Бүсийг бэлхүүсний хамгийн нарийхан хэсгээр бүсэлдэг. Дээр үед бүсгүйчүүд дээлээ бүслэхдээ давсаг хэсгээрээ бүсэлдэг байсан. Хөл нь нарийхан, гэдэстэй харагддаг. 

-Нударгатай дээл хүмүүс их сонгох түгээмэл болсон. Нударга нь дээлд ямар үүрэгтэй вэ? 

-Нударганд нь зохицуулж  дээлийн өнгөө гаргана. Бүс нь нударганы өнгөтэй ижил байхаар их зохицно. Манай дээлийн эмжээр нь торготойгоо өнгө дагуу байгаа. Дээл дэгжин, даруухан загвартай байвал зохимжтой. Хүрээ дээлүүд ч нударгатай гарч байсан. Мөн манай брэнд дээлийн нударгыг сольдог загвартай гаргасан. Цагаан зах гаргасан. Цагаан зах бараан өнгийн дээлийг чимдэг. 

-Та брэндийнхээ талаар мэдээлэл өгөхгүй юу? 

-Манай JBRAND үүсгэн байгуулагдаад таван жил болж байна. Монгол үндэсний бүх гоёлыг худалдаалдаг. Малгай гэхэд ард тоорцог гээд олон сонголт бий. Мөн гутал худалдаалж байгаа. Манайх өөрсдөө загвараа гаргадаг. Манай дээлүүд өмсөхөд их биед эвтэйхэн. 

-Бүх зүйлд үнэ цэнэ, давуу тал бий. Үндэсний хувцсаараа гоёхын сайхан нь юу вэ? 

-Монгол дээлээрээ гоёх сайхан. Монгол хүн болж төрсөн, энэ л өв уламжлалаараа бахархан дээдэлдэг учир бусад орны хүмүүсээс онцгойрох соёлын нэг нь яахын аргагүй үндэсний хувцас. Манайхаас Өвөр монголчууд ирж дээл авдаг. Тэд бидэнтэй ижил үндэсний хувцсыг их эрхэмлэдэг. Би монгол хүн болж төрсөн, үндэсний дээлээрээ гоёдогтоо бахархдаг.