Instagram өсвөр насныхныг хамгаалж 100 сая орчим хаягийг автоматаар “private” болгож эхэллээ

Instagram залуу хэрэглэгчдэд зориулсан Teen Accounts цэсийг нэвтрүүлсэн. Энэ нь өсвөр насны буюу 16-аас доош насны бүртгэлтэй хүүхдүүдийн цахим хуудсыг эцэг эхийн хяналтад байлгах тохиргоо юм. Тус компани энэ долоо хоногоос эхлэн өсвөр насны хүүхдүүдийн хуудсыг автоматаар Teen Accounts цэс рүү байршуулж эхэлсэн байна.

Эцэг эхчүүдэд хүүхдийнхээ нийгмийн сүлжээн дэх үйл ажиллагааг хянах боломжийг олгож, өсвөр насныхны аюулгүй байдлыг хангах үүднээс уг шинэчлэлийг нэвтрүүлээд буй. Энэхүү шинэчлэл нь Instagram дээр хүүхдүүдтэй хэн холбоо барих, ямар төрлийн контент үзэх зэрэгт хяналт тавих аж.

Түүнчлэн эцэг эхийн зүгээс хүүхдийн дэлгэцийн хэрэглээнд хяналт тавьж болох бөгөөд өдөр бүр нэг цагийн турш хэрэглэсний дараа программыг хаах мэдэгдэл очих юм. Мөн шөнийн 22 цагаас өглөөний 7 цаг хүртэл Sleep Mode идэвхжиж, тус цагаар ирсэн мэдэгдэл зурвас зэрэгт автомат хариулагч хариу өгөх байна. Тохиргоог өөрчлөхийн тулд эцэг эхийн зөвшөөрлийг авах шаардлагатай.

Эх сурвалж: CNBC Mongolia