Малаа цахимаар бүртгэж, тоолох боломжтой боллоо

Шимт сүрэг төслийн багийнхан одоогоос хоёр сарын өмнө www.shimtsureg.mn мал аж ахуйн цахим захыг хэрэглэгчдэд хүртээл болгож нээлтээ хийсэн. Энэхүү цахим зах нь малчин болон мал аж ахуйн гаралтай бүтээгдэхүүн хэрэглэдэг хэрэглэгч, худалдаа эрхлэгч нарыг шууд холбох зориулалт бүхий вебсайт юм.

Тэгвэл төслийн хоёр дахь хэсэг буюу малыг цахимаар бүртгэх, тоолох үндсэн функц бүхий “Шимт сүрэг” аппликейшн хөгжүүлэлтийн ажил дуусч  6 сарын 10-ны өдөр нээлтээ хийжээ. Та Шимт сүрэг аппликейшнаа Appstore болон Playstore-оос татан авч хэрэглээрэй. 

“Шимт сүрэг” нь хариуцлагатай малчид, үйлдвэрлэгчид, хэрэглэгчид зэрэг оролцогч талуудын хооронд чөлөөт зах зээлийн эко орчинг бий болгохоор зорин ажиллаж буй, төрийн хамааралгүй, хувийн хэвшлээс бие даан хэрэгжүүлж байгаа төсөл юм. 

 Малчид энэ аппликейшныг ашиглан малаа бүртгэх, тоолох, малын ашиг шимийн мэдээлэл, вакцин тарилга туулга, шилжилт хөдөлгөөний түүхийн мэдээллийг хөтлөх боломжтой. Ингэснээр малынхаа үнэ цэнийг өсгөхөөс гадна хариуцлагатай малчдын тоо нэмэгдэх юм. Хамгийн чухал нь малын бүртгэл тооллогыг та интернэтгүй орчинд хийх боломжтой юм.

Малчин та малаа ээмэгжүүлж бүртгэвэл мэдээж олон давуу талууд бий болно. Гэхдээ ээмэгжүүлээгүй байлаа гээд та санаа зоволтгүй. Учир нь энэхүү аппликейшнаар ээмэгжүүлээгүй малыг ч бүртгэнэ гээд боддоо. Бүр үнэ төлбөргүйгээр, хэн ч ашиглах боломжтойгоор шүү !

Шимт сүрэг аппликейшний бас нэгэн онцлог нь мал тооллогыг хялбаршуулан автоматжуулж, мэдээллийн үнэн зөв байдал, хяналтыг сайжруулах боломжийг олгож буй явдал юм. Малчин та хотноосоо өөр газраас, дэлхийн хаанаас ч аппликейшнд бүртгүүлэн нэвтэрч мал тооллогын явцыг хянах боломжтой. Өдөрт хэдэн ч удаа тооллого хийж болох бөгөөд тоологдсон болон тоологдоогүй малаа ялган харах, тоологдоогүй малыг тухайлан дангаар нь хайх үйлдлийг хийх боломжтой юм. Үүний тулд чиптэй ээмэг, уншигч байхад л болох аж.

Төслийн дараагийн үе шат болох фермер хоршоодын хэсэг, үйлдвэрлэгч болон хэрэглэгчдийг холбох, малын байршил тогтоох систем, мал эмнэлэг лабораторийн хэсгийг хөгжүүлэх зэрэг ажилууд хэдийнээ эхэлсэн явж байна. Үүнтэй холбоотойгоор хамтран ажиллах хүсэлтэй хувь хүн, албан байгууллага та бүхнийг тус төслийн багтай холбогдохыг хүсэж байна.

Дэлгэрэнгүй мэдээллийг: 77769898 утсаар                                            

Системийн талаарх мэдээлэл, зааварчилгааг Facebook/Шимт сүрэг хуудаснаас авах боломжтой.