"Цемент шохой" ТӨХК-ийн тогийг хулгайлан койн олборлож, майнинг хийж байсныг илрүүлжээ

Л.Наранбаатарыг эсэргүүцэж, огцруулах тэмцэл өрнүүлээд байсан бүлэг этгээдүүд төрийн өмчит компанид нууц өрөө гаргаж, тогийг нь хулгайлан койн олборлож байжээ.

"Цемент шохой" ТӨХК-ийн Механик, засварын нэгдсэн цехийн нууц өрөөнд нэр бүхий ажлаас халагдсан этгүүдүүд компанийн тогийг хулгайлан, хуйвалдан койн олборлож, майнинг хийж байсныг тус компанийн Дотоод хяналтын хэлтсийнхэн илрүүлжээ. Тодруулбал, Мэдээлэл технологийн хэлтсийн дарга асан Г.Цолмонбаатар, мөн хэлтийн IT инженер, ахлах мэргэжилтэн М. Уртнасан, Цементийн үйлдвэрийн дарга асан Х.Угтахбаяр,  Эрчим зүй, автоматикийн хэлтсийн ахлах мэргэжилтэн А. Шижирболд нарын хүмүүсийг сэжиглэж, цагдаагийн байгууллагад хандсан байна. Эдгээр хүмүүс нь Л.Наранбаатарыг огцруулах тэмцэл өрнүүлж байсан билээ. 

 Энэ талаар тус компанийн Гүйцэтгэх захирал Л.Наранбаатар "Төрийн өмчийг шимэгчдээс салгана. Үйлдвэр сард 1 тэрбум төгрөгөөс давсан цахилгааны төлбөр төлдөг. Үйлдвэрийн цахилгааныг хулгайлж, койн олборлож байжээ. Хуулийн байгууллагад хандана. Хэн ийм зүйл хийв" хэмээн бичсэн байна. 

Ямартай ч тус үйлдвэрт өнгөрсөн хугацаанд дээр дооргүй хүний нөөцийн шахаа, нүүрс, цементийн болон  хаягдал төмрийн хулгай гарч, нэр бүхий хүмүүсийг хуулийн байгууллага шалгаж байгаа юм. 

Энэ талаар бид холбогдох эздийг тодруулан, үйлдвэрийн удирдлагуудаас мэдээлэл авч, эргэн мэдээлэх болно.