Орхон аймаг хөгжлийн бэрхшээлтэй хүүхдээ асарч буй эцэг, эхийн НДШ-ийг 100 хувь хариуцан төлж байна

Орхон аймаг 2014 оноос хойш хүнд хэлбэрийн хөгжлийн бэрхшээлтэй хүүхдээ асарч буй эцэг, эхийн эрүүл мэнд, нийгмийн даатгалын төлөлтийг орон нутгийн төсвөөс хариуцан төлж эхэлсэн. Өнгөрсөн онд 86 иргэний эрүүл, мэнд нийгмийн даатгалын зардалд  54 сая төгрөгийг зарцуулсан бол энэ онд 101 эцэг, эх,  асран хамгаалагчдын  120 сая төгрөгийн зардлыг орон нутгийн төсвөөс төлж байна.

Хөгжлийн бэрхшээлтэй хүүхдээ асарч буй эцэг, эх ажил хөдөлмөр, эрхлээд нийгмийн харилцаанд тэгш оролцож чаддаггүй. Харин Орхон аймаг  тэдгээр иргэдийнхээ нийгмийн баталгааг хангаж, эрүүл мэндийн үйлчилгээ бүрэн авах боломжийг бүрдүүлэхийн зэрэгцээ Нийгмийн даатгалын сангаас тэтгэвэр тогтоолгох нөхцлийг нь ийн хангаж байна.

Хөгжлийн бэрхшээлтэй хүүхдээ асарч буй эцэг, эхэд бодит дэмжлэг болж буй энэхүү ажил арга хэмжээ нь Монгол Улсад сайн туршлага болж байна.

Тус  аймгийн Засаг даргын 2020-2024 онд хэрэгжүүлэх үйл ажиллагааны хөтөлбөрт ХБИ-дэд чиглэсэн 5 зорилт бүхий 6 ажил үйлчилгээг тусган хэрэгжүүлж байгаа ажээ.