Амиа алдсан Н.Байгалмаагийн нэр төрд халдсан хэмээн Э.Цэрэндолгорыг яллагдагчаар тооцжээ

Иргэн Э.Цэрэндолгорт холбогдуулан гаргасан гомдлын дагуу цагдаагийн байгууллага цөөнгүй хэрэгт түүнийг шалгагдаж байна.

Иргэн Э.Цэрэндолгорыг худал мэдээлэл тараасан нэг бус үйлдэлд яллагдагчаар татаад буй бол хэрэг бүртгэлтийн цөөнгүй хэрэг нээгээд байна. Тухайлбал , тэмээчин Н.Байгалмаа агсны талаар " манай бэр Н.Байгалмаа нь ганцаараа шатаж үхээгүй, н.Энхбат гэгчтэй хамт шатсан, энэ талаар цагдаагийн байгууллага зориуд худал мэдээлсэн, надад баримт байгаа" хэмээн илт худал бичлэг олон нийтэд тараан, амь хохирогчийн нэр хүндэд халдсан.

ЦЕГ-ын Хяналт шалгалт, үнэлгээ, дотоод аудитын хэлтсийн дарга, хурандаа А.Даваасүрэн нь иргэн С.Мөнхзулд үйлчилдэг, түүний хууль бус үйлдлийг нуун дарагдуулдаг гэх агуулга бүхий бичлэг цацаж, цагдаагийн алба хаагчийн нэр хүндэд халдсан, иргэн С.Мөнхзулын нэр төрд халдсан бичлэг хийж олон нийтийн сүлжээнд цацсан үйлдлүүдэд яллагдагчаар татжээ.

Зариг.мн цахим сайтын эрхлэгч Н.Өнөрцэцэг, Баянзүрх дүүргийн Цагдаагийн газрын дарга, дэд хурандаа П.Очбадрах, иргэн Ц.Хэрлэнтуяа, С.Мөнхзул нарын гаргасан гомдлын дагуу хэрэг бүртгэлтийн хэрэг нээн Э.Цэрэндолгорыг шалгаж буй аж.