Дорнод аймаг аялал жуулчлалаас 9.5 тэрбум төгрөгийн орлого олжээ

Дорнод аймаг энэ он гарсаар аялал жуулчлалын салбараас 9.5 тэрбум төгрөгийн орлого олжээ. Гадаадын жуулчин тус аймгийн нутгаар 5-9 хоног аялахдаа дунджаар 4-5 сая төгрөг, дотоодын жуулчин 600 мянгаас 2.5 сая төгрөг зарцуулдаг байна.

Аймгийн хэмжээнд дулааны улиралд жуулчдад үйлчлэх боломжтой 61 үйлчилгээний газар байдаг бөгөөд нэг удаад нийт 1000 орчим хүн хүлээн авах хүчин чадалтай. Харин өвлийн улиралд ажиллах жуулчны бааз, амралтын газар одоогоор байхгүй байна.

Монгол Улсын хэмжээнд хийсэн аялал жуулчлалын хөгжлийн индексээр Дорнод аймаг 11 дүгээр байрт эрэмбэлэгджээ. Гэвч аялал жуулчлалыг хөгжүүлэхэд тулгамдаж буй гол асуудлын нэг нь авто зам юм. Дорнод аймаг газар нутгийн хэмжээгээр улсад гуравдугаарт ордог ч Булган, Хөлөнбуйр сумаас бусад сумтай авто замаар бүрэн холбогдоогүй байна. Судалгааны дүгнэлтэд тус аймгийг байгаль, түүх, соёлын арвин нөөцтэй гэж онцолжээ.