Эгэл жирийн төрийн албан хаагчдын төлөөлөлд “Салбарын онцлох ажилтан” өргөмжлөл гардууллаа

Ковид-19 цар тахлын үед ард иргэдийнхээ эрүүл мэнд, амь насыг авран хамгаалахын төлөө өргөсөн тангарагтаа үнэнчээр зүтгэн, хүлээсэн үүргээ нэр төртэй биелүүлж яваа мянга мянган эгэл жирийн төрийн албан хаагчдын төлөөлөл болсон 5 албан хаагчийг аймгийн Онцгой комиссын шийдвэр, Засаг даргын захирамжаар “Салбарын онцлох ажилтан”-аар өргөмжлөн тус бүр 500 мянган төгрөгөөр шагнан, хүндэтгэлийн туузыг өнөөдөр /2022.01.24/ зүүж өглөө.
Улиран өгөрч буй ҮХЭР жилийн “САЛБАРЫН ОНЦЛОХ АЖИЛТАН”-аар:

Нэгдсэн эмнэлгийн Амаржих тасгийн эх баригч Бадарчийн Нямхишиг

Дархан сумын 15 дугаар багийн МЭДСТОБ өрхийн эрүүл мэндийн төвийн сувилагч Бадамжавын Ариунаа

Мэргэжлийн хяналтын газрын Эрүүл ахуй, халдвар хамгааллын хяналтын Улсын байцаагч Дэлгэрцогтын Нямчимэг

Цагдаагийн газрын нийтийн хэв журмын цагдаа, дэд ахлагч Гансүхийн Энхтөр

Онцгой байдлын газрын аваргч гал сөнөөгч, ахлах ахлагч Гантулгын Гэрэлчулуун нар тус тус шалгаран удирдагуудаас шагналаа гардан авсан юм.

Энэ үеэр Дархан-Уул аймгийн Засаг дарга бөгөөд Онцгой комиссын дарга Б.Азжаргал шагнал авсан төрийн албан хаагчдад хандан АОК-ын зүгээс болон хувиасаа, нийт Дарханчуудынхаа өмнөөс чин сэтгэлийн талархал илэрхийлэн цаашдынх нь ажилд амжилт хүслээ.