Онгоцны дугуйнд нуугдан иргэн Амстердам оржээ

Өмнөд Африкаас нисэж Амстердамын Схипхол нисэх буудалд газардсан онгоцны урд дугуйн хэсгээс амьд мэнд “туулайчилсан” хүн олсон тухайгаа Нидерландын цагдаагийн газар мэдэгдсэнийг “BBC” агентлаг уламжилжээ.

 Өмнөд Африкийн Йоханесбургаас Амстердам хүртэл 11 цаг нисдэг ч энэ удаад ачааны онгоц замдаа Кени улсын Найробид түр зогссон юм байна. 

 Онгоцны дугуйн хэсэгт нуугдсан хүн олон цагийн турш 10  мянган метрийн өндөрт нисэх үед хэт хүйтэн болон хүчилтөрөгчийн дутагдлаас болж амьд гарах нь тун ховор. 

 Цагдаа нар амьд гарч чадсан хүний нас, хүйс, иргэний харьяаллыг хараахан тогтоож чадаагүй байгаа аж. Нидерландын Вангийн цэргийн цагдаагийн төлөөлөгч энэ талаар мэдэгдэхдээ “Онгоцны хамар хэсгээс амьд эрэгтэй хүн олдсон бөгөөд эмнэлэгт хүргэгдэх үедээ биеийн байдал нь тогтвортой хэвийн байсан. Хачирхалтай нь тэр хүн үнэхээр амьд байсан шүү” гэжээ.

 Нидерландын “NOS” сувгийн мэдээлснээр азтай эрэгтэйг онгоцны хамар хэсгээс гаргаж авсны дараа биеийн температур нь аажмаар нэмэгдсээр түргэн тусламж ирэх үед өөрт нь тавьсан асуултуудад хариулах чадвартай болсон гэж байна. 

 Агаарын ачаа тээврийн “Cargolux” компани нь “Cargolux Italia”-ийн үйлдсэн нислэгээр тасалбаргүй зорчигч нуугдаж ирсэн гэдгийг баталсан байна. Тэдний мэдээгээр ням гарагт Йоханесбургаас Схипхол орох нислэг хийсэн “Cargolux”-ийн цор ганц нислэг нь замдаа Найробид түр буусан аж. Иймд тухайн эрэгтэй хүн Өмнөд Африкаас онгоцонд нуугдсан уу эсвэл Кенийн Найробид түр буухад нуугдсан уу гэдгийг тогтоож чадаагүй байгаа юм байна.