ШЕЗ-ийн дарга Э.Батбаяр коронавирусаар халдварласан ажилтнаа нуух гэж оролдсон уу?

2020 оны арванхоёрдугаар сарын 2-нд буюу өчигдөр ШЕЗ-ийн нэгэн ажилтнаас коронавирус илэрснийг Зариг мэдээлсэн. Өнөөдөр ХӨСҮТ-өөс тус зөвлөлийн үйлчлэгчээс коронавирус илэрсэн, түүний хавьтал болох ШЕЗ-ийн 37 хүнийг тусгаарласан гэж мэдэгдэв. Харин Шүүхийн Ерөнхий зөвлөлийн удирдлагууд энэ мэдээллийг нууцлахыг оролдож ажилтнуудадаа мөнгө өгөхийг санал болгосон гэх мэдээллийг сэтгүүлч Б.Ганчимэг, Ч.Доржбат нар цахим хуудсандаа мэдээлжээ. 

Энэ талаар Шүүхийн ерөнхий зөвлөлийн дарга Э.Батбаяртай бид утсаар холбогдлоо. 

- Та коронавирус илэрсэн ажилтны мэдээллийг нуухын тулд бусад хүмүүст 400-500 000 төгрөг амалсан гэж үнэн үү? 

-  Өчигдөр 11 цагийн үед хурлаа хийх гэж байхад гэнэт ХӨСҮТ-ээс ирээд нэгдүгээр хавьтал, дам хавьтлын ажилчдыг нэрсийг танилцуулсан. Энэ дагуу тусгаарлах ажлууд хийгдэж, шинжилгээнүүд авагдсан. Энэ бүх мэдээллийг яах гэж нуух юм бэ, бүх асуудал нүдэн дээр Эрүүл мэндийн байгууллагын удирдамжаар хөндлөнгөөс явж байхад. Та нар боддоо, ер нь яах гэж тэр мэдээллийг нуух уу, нууж ер нь болох уу, нуух хэнд хэрэгтэй юм. Энэ өвчин зовлонгийн хажуугаар сэтгүүлч нар та нар жаахан ёсзүйтэй байгаач.  

- Тухайн үйлчлэгч маскгүй ажиллаж байсан гэж үнэн үү? 

- Худлаа, манайхан бүгд маск зүүдэг. 

- Тухайн үйлчлэгч эмэгтэй зөвхөн хоёрдугаар давхарт л ажилладаг үнэн үү? 

- Үнэн. Манайх дөрвөн үйлчлэгчтэй. Давхар давхраа хариуцаад ажилладаг, тэд ариутгал халдваргүйжүүлэлтийн ажлыг хийдэг богино цагаар ажилладаг байсан. 

- Та бүхнийг гэрт нь тусгаарлачихлаа. Шүүх хурлууд хэвийн үргэлжлэх үү? 

- Шүүхийн ерөнхий зөвлөл бол шүүхийн захиргааны байгууллага. "Ковид 19" цар тахлын үед тусгай түр журам гаргаад ажиллаж байгаа. Шүүх хурлууд энэ үйл явдалтай холбоотойгоор хойшлохгүй, хэвийн үргэлжилнэ.