Амт, үнэртэй тамхийг хориглож, янжуур болон вэйпэд адил татвар ногдуулна

Хуулийн төслийг санаачлагч, УИХ-ын гишүүн О.Номинчимэгийн хэлснээр, парламент 13 жилийн турш шинэчилж чадаагүй байсан тамхины хяналтын хуульд өөрчлөлт оруулж, ирээдүй хойч үеийнхээ эрүүл мэндийг хамгаалах алхам хийжээ. Мөн 2030-2031 он гэхэд тамхидалтыг 13 хувиар бууруулах зорилт тавьсан байна.

Харин УИХ-ын гишүүн А.Ариунзаяа янжуур болон электрон тамхи буюу вэйпэд адил татвар ногдуулж, ижил зохицуулалтад хамруулна гэдгийг онцоллоо. Түүнчлэн жимсний амт, гаа болон үнэр оруулсан тамхины бүтээгдэхүүнийг хориглох зохицуулалт тусгасан байна. Харин уламжлалт монгол хамрын тамхинд уг хуулиар хориг, хязгаарлалт тогтоохгүй гэж мэдэгджээ.

Хуульд дараах гол өөрчлөлтүүдийг тусгажээ.

• Электрон, халаадаг болон никотин агуулсан шинэ төрлийн бүтээгдэхүүний зохицуулалтыг боловсронгуй болгох

• Залуучуудын тамхины хэрэглээг өдөөж буй амт, үнэрт хязгаарлалт тогтоох

• Тамхины бүх төрлийн бүтээгдэхүүний онцгой албан татварыг үе шаттай нэмэгдүүлэх

• Хяналт, хариуцлагыг чангатгах

• Тамхины хамаарлаас гарах эрүүл мэндийн тусламж, үйлчилгээний хүртээмжийг нэмэгдүүлэх

• Тамхины хэрэглээнээс урьдчилан сэргийлэх үйл ажиллагааг эрчимжүүлэх

Эрүүл мэндийн яамнаас хуулийн хэрэгжилтийг хангах, салбар хоорондын хамтын ажиллагааг бэхжүүлэх, иргэдийн эрүүл мэндийн боловсролыг дээшлүүлэх чиглэлээр ажиллах юм байна.

Шинэ зохицуулалт нь тамхины хэрэглээг бууруулах, түүнээс үүдэлтэй өвчлөл, нас баралтаас урьдчилан сэргийлэх, эрүүл, аюулгүй орчныг бүрдүүлэхэд чиглэжээ.