МАНХ-ны даргад дэглэм үйлчилдэггүй, ковид халдварладаггүй юм уу

Монгол улс даяар “Бүх нийтийн бэлэн байдал” зарлаж хөл хорионы хатуу дэглэм үйлчилж байна. Гэтэл энэхүү дэглэм нь эрх баригч нарт үйлчилдэггүй болохыг бид баримтаар дэлгэж байна. 

Тодруулбал Завхан аймгийн Баятэс сумын МАН-ын хорооны дарга Х.Алтанхуяг нь Улаанбаатар хотоос 2020 оны арваннэгдүгээр сарын 21 –ний өдөр гарч хоёр хоногийн дараа буюу арваннэгдүгээр сарын 23-ны өдөр сумандаа очжээ.
Тус сумын иргэд нь цагдаагийнхаа байгууллагад энэ тухай мэдээлснээр Х.Алтанхуягийг гэрт нь яаралтай тусгаарлаад байгаа аж. Тэрбээр энэ тайлбарлахдаа “Чингэлтэй дүүргийн эмнэлгээр үзүүлсэн, түргэвчилсэн оношлуурын шинжилгээгээр намайг сөрөг гэсэн, тиймээс би ирсэн” гэжээ.
УОК-ын дарга Я.Содбаатар мэдээлэхдээ ар гэрт нь гачигдал гарсан, оршуулганд оролцож буй иргэдийг зайлшгүй гэдгээр Улаанбаатар хотоос гаргасан гэж тайлбарласан юм. Гэтэл Х.Алтанхуягийн ар гэрт гачигдал гараагүй байхад яаж яваад ирснийг нутгийнхан нь гайхаж, бас түүнээс жийрхэж байна. Саяхан Эрүүгийн цагдаагийн газраас нас барагсдын гэрчилгээг хуурамчаар үйлдэж, түүнийгээ орон нутгийн иргэдэд 100-250 000 төгрөгөөр зарсныг илрүүлсэн гэж мэдээлэв. Эрх баригч намын хорооны дарга нь арай тэрхүү хуурамч бичгээр орон нутагт зорчоогүй биз гэдэг асуулт гарч ирж байна. МАН-ын хорооны даргад ковид тусахгүй, иргэн Дорж, Дулмаад ковид тусна гэдэг дүрэм хаана ч байхгүй, тиймээс тухайн асуудлыг хууль хяналтын байгууллага анхааралдаа авахыг уламжлая.