Орос улсад COVID-19-ийн өвчлөл тогтвортой хэмжээнд байна

COVID-19-ийн өвчлөл ОХУ-д тогтвортой түвшинд байгаа боловч зарим бүс нутагт халдвар нэмэгдэж байна хэмээн Эрүүл мэндийн сайд Михаил Мурашко телевизийн "Россия 1" сувагт өгсөн ярилцлагадаа хэлсэн байна.

"Өвчлөлийн байдал хэвийн тогтвортой байгааг тоон үзүүлэлт харуулж байгаа боловч амралтаар аялсан хүмүүс буцаж ирж байгаатай холбогдуулан зарим бүс нутагт халдварын тоо нэмэгдэх хандлагатай байна. Шинээр халдвар бүртгэгдэж байгаа ч энэ олон хүнийг хамарсан давалгаа маягтай биш байна” хэмээн сайд ярьлаа.

Халдвар тархаж эхэлсэн хаврын үетэй харьцуулбал эмч, эмнэлгийн ажилтнууд коронавирусийн халдвар авсан өвчтөнийг илүү амжилттай, богино хугацаанд эмчилж байгааг  Михаил Мурашко онцолсон байна.

Есдүгээр сарын 14-ний байдлаар халдвар авсан 90 мянга орчим хүн эмчлүүлж байна. Сүүлийн 24 цагийн дотор COVID-19-ийн 5449 шинэ тохиолдол бүртгэгдсэн бол 94 өвчтөн нас барсан тохиолдол бүртгэгдлээ.

Нийтдээ ОХУ-д коронавирусийн 1 062 811 тохиолдол бүртгэгдсэн гэж РИА НОВОСТИ-с мэдээллээ.