​ “Black Lives Matter” ба бизнес​

АНУ-д өрнөсөн “Black Lives Matter” хөдөлгөөний нөлөөгөөр Америк ба Европын том компаниуд “харж ялгах онцлог байдал” гээч зүйлээ өөрчлөх давлагаа эхлүүлсэн тухай Европын сонин хэвлэлүүд бичиж байна. Тухайлбал, Францын “Le Figaro“ сонин бизнес сургалтаар дамжин АНУ-д гарсан өөрчлөлт нь дэлхий даяар нөлөөлдөг гэдгийг онцолсон байна. Онолын хувьд компаниуд нь нийгэмд ноёлж байгаа урсгалыг даган өөрчлөгдөх замаар яс үндэс, арьсны өнгө ба бэлгийн чиг хандлагаар цөөнх болж байдаг бүлэглэлүүдийг дэмжих замаар хэрэглэгчидтэй холбоо тогтоож, улам их ашиг олдог. Гэвч олон нийтийн сүлжээ, нийгмийн хариуцлага өндөр болсон орчин үед АНУ-д гарсан өөрчлөлтийг үл тоож, юу ч хийхгүй зүгээр суувал бүтээгдэхүүн нь бойкот, эсэргүүцэлтэй тулгаран хэрэглэгчдээ бүрэн алдах аюултай болжээ. Улмаар орчин үед ЛГБТ, феминист, арьсны өнгөөр гадуурхахыг эсэргүүцэгчид, вегануудын холбоонууд үнэт зүйлс, байр суурийг нь дэмжихгүй гэж үзэн давшилж эхэлбэл тэдний дайралтыг эсэргүүцэх боломжгүй болох дээрээ тулсан байна.

Ингэснээр “Mars” компани дэлхийд алдартай “Uncle Ben’s” брэндээ соёл ба нийгэмд гарсан өөрчлөлтөд нийцүүлэхийн тулд хайрцаг сав дээрх хижээлдүү насны хар арьст эрэгтэйн зургаа буюу “харж ялгах онцлог байдал” гээч зүйлээ өөрчлөхөөр болсон. “Pepsico” концернын мэдэлд байдаг “Aunt Jemima” шарвингийн гурил нь уутан дээрх инээмсэглэж байгаа хар арьст эмэгтэйн зургийг нэрийн хамт өөрчлөхөөр болжээ. Учир нь энэ бүх зургууд АНУ-д нэгэн цагт арьсны өнгөөр ялгаварлан гадуурхаж байсныг сануулж байгаа юм гэнэ. Ингээд зогсохгүй “Dreyer's Grand ice cream” компани нь алдартай “Eskimo pie” зайрмагийн нэр нь Аляскийн уугуул оршин суугчид болох эскимосуудын хувьд доромжилсон агуулгатай гэж үзээд солихоор болжээ. Цаашлаад Францад алдартай “Banania” брэнд нь сав баглаан дээрээ талбай дээр ажиллаж байгаа Сенегалын хар арьст ажилчны зургийг цаашид байршуулахгүй болсон байна. Францын өөр нэг брэнд болох “Pepito”-г уутан дээрээ комикс ном дээр гардаг Мексик сахиус байршуулсан байсныг АНУ –д олон саяар байдаг мексикчүүдийг үл хүндэлсэн байна гэж шүүмжилсэн байна.

Үүнээс гадна “Facebook” гэх мэт олон нийтийн сүлжээнд арьсны өнгөөр гадуурхсан, үзэн ядсан нийтлэл, зураг, тайлбарууд ямар ч цензургүй чөлөөтэй бичигдэж байгааг “Black Lives Matter” хөдөлгөөнийхөн хүчтэй шүүмжилсэн. Үүний дараагаар дэлхийд алдартай том компаниуд энэ шүүмжлэлийг дэмжиж, цаашдаа ийм агуулгатай зураг, нийтлэл оруулахгүй болгох журам тогтоох хүртэл олон нийтийн сүлжээнд ямар ч сурталчилгаа байршуулахгүй байхаар болсон байна. Энэ аяныг “Coca-Cola Company”, “North Face”, “Verizon Communications Inc”, “Unilever”, “Starbucks” гэсэн компаниуд дэмжин “Facebook” дээр реклам байршуулахаар тодорхойгүй хугацаагаар зогсоосон байна. Үүнээс болж “Facebook” компанийн хувьцааны 8,3 хувиар буурч, 7,3 тэрбум долларын хохирол хүлээгээд байгаа аж.

Мөн Америкийн алдарт “Симпсоныхон” цуврал хүүхэлдэйн кинонд дараа дараагийн ангиуд дээр цагаан арьст жүжигчид хар арьст дүрд дуур оруулахгүй болсон байна. Цувралын продюсерууд нь “Цаашдаа цагаан арьст жүжигчид нь цагаан биш дүрүүдэд дуу оруулж байхгүй” гэж мэдэгджээ.