Б.НАНСАЛМАА: ХЭРГИЙГ УВС АЙМГИЙН ЦАГДААГИЙН ГАЗРААР ШАЛГУУЛАХГҮЙ ГЭЖ ХҮСЭЛТЭЭ ГАРГАСАН

Увс аймгийн цагдаагийн алба хаагчид хүүхэд хүчирхийлсэн, жирэмсэн болгосон асуудлаар тус аймгийн ГБХЗХГ-ын дарга Б.Нансалмаагаас тодрууллаа.

-Танай аймагт сурагч охид цагдаагийн алба хаагчдад хүчиндүүлсэн хэргүүд гарчээ. Охидын биеийн байдал ямар байгаа вэ?

-Зүүнхангай сумын харьяат сурагч охиныг тус сумын цагдаа О.Д хүчиндсэн хэрэг гарсан. Охин 6 сартай жирэмсэн. Аймгийн ГБХЗХГ-ын хамгаалах байранд эмнэлгийн болон сэтгэлзүйн туслалцаа аваад байж байна. Хүүхэд анх ирсэн үеэ бодоход тайвширсан. Гэхдээ “Энэ хүүхдийг тээхгүй, төрүүлэхгүй. Авахуулна” гэж уйлж орилж сэтгэлзүйн хувьд хүнд байгаа. “Ураг тээлтийг таслан зогсоохгүй бол амиа хорлоно” ч гэж уйлж байгаа болохоор хамгаалалтад авахаас өөр аргагүй байдал үүсээд байна. Гэхдээ тээлтийг таслах хугацаа өнгөрсөн. Ураг 6 сартай болсон тул эмч нар зөвшөөрөхгүй байна.

-Охины ар гэрийн нөхцөл байдлын талаар мэдээлэл өгөөч?

-Охин аавтайгаа хамт амьдардаг. Гэр нь сумын цагдаагийн байрны хашаанд байдаг. Аав нь хараа хяналт муутай хүн байсан нь охин хохирох шалтгаан болсон. Аав нь одоо сумандаа байгаа.

-Энэ хэрэг хуулийн хүрээнд ямар шатанд шалгагдаж байна вэ?

-Энэ хэргийг аймгийн цагдаагийнхан, хуулийн хэлтсийнхэн нуучихсан байсан гэж хэлж болно. Мөн сургуулийнх нь эмч, захирал ч хэргийг нуух оролдлого гаргасан. Тодруулбал, охиныг аймгийн төв рүү ирэх үед сургуулийнх нь захирал “Замын жолоочид хүчиндүүлсэн гэж хэлээрэй. Сумын цагдаад хүчиндүүлсэн гэж хэлж болохгүй шүү. Сургууль, сум орон нутгийн нэр хүндийг бодоорой” гэгчлэн дарамт шахалт үзүүлсэн талаар охин хэлсэн.

Ер нь хүүхдийн бэлгийн хүчирхийллийн асуудлыг орон нутгийн нэр хүнд гэдэг халхавчаар нуун дарах хандлага их бий. Энэ хэрэг дээр ажиллаж эхэлснээр надад ч маш их дарамт ирж байна. Аймгийн цагдаагийн газраас, аймгийн Хуульзүйн хэлтсээс маш их дарамт ирж байна. Ажлаа хийхэд хүнд хэцүү байна.

Тиймээс энэ хэргийг “Увс аймгийн цагдаагийн байгууллагаар шалгуулахгүй” гэдэг хүсэлтээ ГБХЗХГлуу албан бичгээр явуулсан.

-Ер нь танай аймагт энэ төрлийн хэрэг дарагдсан тохиолдол бий юу?

-Дарагдсан гээд хэлчихвэл гүтгэсэн хэрэгт орох болов уу. Гэхдээ өнгөрсөн нэгдүгээр сарын 29-нд 14 настай охиныг МСҮТ-ийн хоёр оюутан зочид буудалд дагуулан орж хүчиндсэн хэрэг гарсан. Энэ хэргийг цагдаагийн байгууллага хэрэгсэхгүй болгон хаасан. Учир нь “хоорондоо зөвшилцсөн” гэдэг шалтгаанаар хэрэгсэхгүй болсон юм байна лээ. Энэ мэт 2018 онд хүүхэд хүчиндүүлээд хэрэгсэхгүй болсон хэрэг 3 байна. Мөн 2018 онд хүүхэд хүчиндүүлсэн 13 хэрэг шүүхээр шийдэгдсэн. Одоо мөрдөн байцаалтад 6 хэрэг байна.

-Түүнчлэн аймгийн хэмжээнд хүүхэд хүчирхийлэлд өртсөн тоо судалгаа ярихад цагдаагийн болон Хуулийн хэлтсийнхэн маш дургүй байдаг. “Тоо судалгаа битгий ярь. Тоо ярих юм бол ажлаа өгөөд зайлаарай” гэж ч дарамталж байсан. Хүүхэд хамгаалах, хохирсон хүүхдэд үйлчилгээ үзүүлснийхээ төлөө байнгын дарамтад байгаа нь маш хүнд байна.

-Зургаан сартай жирэмсэн болсон охиноос гадна өөр нэг охин цагдаагийн алба хаагчид хүчиндүүлсэн хэргийн талаар мэдээлэл өгөөч.

-Тухайн охины найз хөвгүүн Улаанбаатараас ирснийг Өндөрхангай сумын цагдаагийн алба хаагч “оргодол байж болзошгүй” хэмээн Улаанбаатар луу авч явсан. Харин нөгөө цагдаа нь охиныг хүчиндсэн талаар охины ар гэрийнхэн аймгийн цагдаагийн газарт дуудлага өгсөн байдаг. Энэ хэрэг энэ сарын 10-ны өдөр гарсан. Охины хувьд биеийн байдал тогтворжсон.