ГЭРЭЛТ МЭДЭЭ: Ө.ЭНХМАРАЛ ОХИНЫ ЗҮҮН ХӨЛ МЭДЭЭ ОРЖЭЭ

Аврал эрэх мэт алаг нүд нь дүүрэн нулимстай, булцгар жаахан гараа сунган тусламж гуйх нялх охины зураг нүүр номоор дүүрсэн хөндүүр өдрүүд үргэлжилнэ. Өдөр хоног өнгөрөх тусам охины эмчлэгдэх боломж хумигдаж байгааг сонсоход зүрх шимширнэ. Ө.Энхмарал охин дөрөв хоногийн өмнө буюу тавдугаар сарын 10-ны өдөр нэг нас хүрсэн. Нуруу нугасны хавдар өвчнөөр шаналж байгаа тэрбээр өдгөө Бээжингийн эмнэлэгт ээжтэйгээ хамт эмнэлгийн тусламж авахаар итгэл найдвар өвөртлөн хүлээж байна. Учир нь түүний хавдрыг авах хагалгаа товлогдсон ч мөнгөгүйн улмаасзогссон, хүлээгдсэн. Хятад эмч нар охиныг цаг алдалгүй мэс засалд орж чадвал бүрэн эдгэрэх, хөл дээрээ босоод гүйх боломжтойг хэлсэн. Энэ хагалгааны зардал 50 сая төгрөг. Мөнгөтэй хүний хувьд гадаад руу нэг аялаад ирэх зардал бол арга мухардсан хүнд амар бүрддэггүй, хүүхдийнхээ амийг харсаар байж алдах айдсын ирэн дээр очих их мөнгө ажээ. Тиймээс л “үрийг минь авраач, бидэнд туслаач” хэмээн хоолой зангиран гуйгаад удлаа. Сайхан сэтгэлт ард түмэн өглөгийн гараа дэлгэж, эхний хагалгааны мөнгийг бүрдүүлэн, охиныг хагалгаанд оруулсан. Хагалгааны дараа охины зүүн хөл мэдээ орсон сайхан мэдээг алс холоос ээж нь, ард нь мөнгө олох гэж үлдсэн аав нь дуулгаж байна. Дахиад нэг л хагалгаа, 50 сая төгрөг. Охин хөл дээрээ босоод гүйнэ. Тэр гайхамшгийг сайхан сэтгэлт та бүхний өглөгөөс өөр хэн ч, юу ч бий болгож чадахгүй. Учир нь Тавантолгойд жолооч аав нь охиноо эмчлүүлэх гэж ажлаасаа урт хугацааны чөлөө авсан, орлогогүй болсон. Ах дүү цөөтэй ээжид нь орлого мөнгө байтугай хүүхдийг нь асралцаад өгөх хүн ч байхгүй өнөөдөрт хүрсэн юм. Ийм л “дээшээ тэнгэр хол, доошоо газар хатуу” цаг үед Ө.Энхмарал охин амьдрал гуйж байна.

5090770421 ХААН БАНК ээж Эрдэнэтунгалаг

Холбогдох утас: 9148-1828 9133-3934