ЭХ БАРИГЧ ЭМЧ ХАР ТАМХИ ХЭРЭГЛЭСЭН БАЙЖЭЭ

Өмнөговь аймгийн Баян-Овоо сумын Эрүүл мэндийн төвийн эх баригч мансуурах төрлийн сэтгэцэд нөлөөлөх бодис хэрэглэсэн байсан нь тогтоогджээ. Хүний эрүүл мэндийг сахин хамгаалах тэр дундаа жирэмсэн эхэд эмчилгээ үйлчилгээ үзүүлж шинэ иргэн төрөхөд эх барьж авдаг эмч мансууруулах төрлийн бодис хэрэглэсэн гэх тохиолдол анхны удаа бүртгэгдэж буй юм.

Хэргийг тодруулбал, тавдугаар сарын 6-ны өдрийн 11:10 цагт “Эрүүл мэндийн төвийн эх баригч эмч хар тамхи хэрэглэсэн байж болзошгүй” гэх мэдээлэл эмчлүүлэгчийн зүгээс ирсэн байна. Цагдаагийн байгууллагын алба хаагчид тус Эрүүл мэндийн төвд очиж шалгалт явуулахад тус сумын нутагт оршин суух хаягтай, Эрүүл мэндийн төвийн эх баригч, бага эмчээр ажилладаг эмэгтэй 52 настай Ө нь хар тамхи, мансууруулах төрлийн бодис хэрэглэсэн байж болзошгүй байдал илэрчээ.

Эх баригч эмчээс сорил авч шинжилгээнд хамруулахад мансууруулах төрлийн сэтгэцэт нөлөөлөх эмийн жагсаалтанд орсон бодисыг хууль бусаар хэрэглэсэн болох нь урьдчилсан байдлаар тогтоогдоод буй аж. Уг хэргийг Өмнөговь аймгийн цагдаагийн газарт шалгаж эхэлсэн бөгөөд мансууруулах бодис хэрэглэсэн эх баригч эмчийг мансууруулах төрлийн бодис хууль бусаар олж авсан, хууль бусаар хэрэглэсэн, хадгалсан, тээвэрлэсэн хэрэгт буруутган шалгаж байна.