“ИРГЭДИЙН ОРОЛЦООТОЙ ШИНЭ ХЭНТИЙ” ТӨСӨЛ ХЭРЭГЖҮҮЛЖ БАЙНА

Төрийн бүхий л шатны үйл ажиллагаанд иргэдийн оролцоог нэмэгдүүлэх, идэвх санаачилгыг дээшлүүлэх зорилгоор "Иргэдийн оролцоотой Шинэ Хэнтий" төслийг Хэнтий аймгийн ЗДТГ, "Тогтвортой амьжиргаа 3" төсөл хамтран хэрэгжүүлж эхэлжээ.

Тус хөтөлбөрийн хүрээнд айл өрхийг аравтын зохион байгуулалтад оруулж, 18 сум 88 багт 120 хөгжлийн чиглүүлэгч томилон ажиллуулж байна.

Хөгжлийн чиглүүлэгчид нь тухайн хариуцсан аравтын бүлэгтээ мэдээ мэдээлэл хүргэх, санал хүсэлтийг хүлээн авч холбогдох дээд байгууллагад уламжлах, сум орон нутагт тулгамдсан асуудлаар хэлэлцүүлэг зохион байгуулж хамтдаа шийдвэр гаргах зэрэг үүрэг хүлээхээс гадна ОНХС-ийнтөлөвлөлтийнүйлажиллагаанд иргэдийн идэвх санаачилгыг сайжруулахад түлхүү анхаарч ажиллана. Ингэснээр иргэдийн оролцооны дундаж 2019 онд 70 хувь, 2020 онд 100 хувьд хүрсэн байх зорилт дэвшүүлжээ.

Өнгөрсөн онд Хэнтий аймгийн Баян-Овоо суманд туршилтын журмаар хэрэгжүүлсэн "Аравт" төслийн үр дүнд малчид иргэд бэлчээр, газар усны маргаанаа хамтдаа шийдвэрлэж, хадлан тэжээлээ хамтдаа бэлтгэж, үйлдвэрлэл эрхэлж өрхийн орлогоо нэмэгдүүлсэн зэрэг сайн туршлагууд бий болсон байна. Тиймээс энэхүү үр дүнгээс санаа авч аймгийнхаа хэмжээнд хэрэгжүүлэхээр орон нутгийн удирдлагууд шийдвэрлэжээ.

Тиймээс чиглүүлэгчдийг чадвахжуулах, зохих мэдлэг ур чадварыг эзэмшүүлэх зорилгоор 5 бүлэгт хуваан сургалтад зохион байгуулж байна.