KFC-ГЭЭР ҮЙЛЧЛҮҮЛСЭН ХӨХҮҮЛ ХҮҮХЭДТЭЙ ЭЭЖ НАЙМАН САРТАЙ ХҮҮХДЭЭ УГЖИЖ БАЙНА

KFC-гийн Зайсан дахь салбараар үйлчлүүлээд хордлогонд орсон хөхүүл хүүхэдтэй эмэгтэй манай сайтад хандлаа. Тэрээр хордлого тайлах эмчилгээ хийлгэж байгаа ч бие нь дээрдэхгүй байгаа гэв. Тэрээр ХӨСҮТ-д хандаагүй харин гомдлоо Зайсанд байрлах KFC-гийн салбарт гаргаж бүртгүүлжээ. KFC-гээр үйлчлүүлээд гомдолтой үлдсэн түүнээс цөөн хэдэн асуултанд хариулт авлаа.

- Зайсанд байрлах KFC-гийн салбараар хэзээ, хэнтэй хамт үйлчлүүлсэн бэ?

- 2019 оны хоёрдугаар сарын 11-нд 18 цагийн орчимд нөхөртэйгээ хамт 23 500 төгрөгийн бүтээгдэхүүн авч хооллосон. Харин маргааш нь буюу хоёрдугаар сарын 12 -нь өглөөнөөс эхлээд нөхөр бид хоёр бөөлжиж, гүйлгэсэн. 13-ны өдрөө гүйлгэлт, бөөлжилт зогсохгүй хамаг бие тэнхэлгүй болж хувийн эмнэлэгт хандаад одоо эмчилгээгээ үргэлжлүүлж байна.

- Биеийн байдал нь дээрдэж байна уу? ХӨСҮТ-д яагаад хандаагүй юм бэ?

- Манай хүүхэд найман сартай, би хүүхдээ хөхөөрөө хооллодог. Хордлого авсан учир хөхөөрөө хооллож болохгүй угж хөхүүлж байгаа. "Интермэд" эмнэлэгт үзүүлсэн, 420,000 орчим төгрөгийн эмчилгээ хийлгээд байна. Одоо ч биеийн байдал дээрдэхгүй, ажилдаа явж чадахгүй байна. KFC-рүү утсаар ярьсан гомдлыг тань хүлээж аваад бүртгэлээ, манай буруу гэдгийг албан ёсоор тогтоогоогүй, шинжилгээний хариу хүлээж байгаа гэж мэдэгдсэн. Бид гомдолтой байна.