АМИА АЛДСАН ЦЭРЭГТ ЗОРИУЛАН ЭРДЭНЭТЧҮҮД ЛАА АСААН ХҮНДЭТГЭЛ ҮЗҮҮЛЛЭЭ

Дорноговь аймгийн Зүүнбаянгийн 336 дугаар ангид алба хааж байсан 19 настай А нь өнгөрсөн долоо хоногт золгүй байдлаар амиа алдсан. Энэхүү харамсалтай хэрэгт Ажлын хэсэг байгуулагдан шалгаж байгаа бөгөөд ар гэрийнхэн болон өмгөөлөгчид нь талийгаачийг гадны нөлөөтэй амиа алдсан гэж үзэж байгаа юм. Өнгөрсөн долоо хоногт талийгаачийн өмгөөлөгч Б.Өлзийцэрэн хэвлэлийн хурлын үеэр "Бидний зүгээс уг хэрэг гадны нөлөөтэй гэж үзэж байна. Талийгаач амьсгалын дутагдалд ороод бахардаж байхад нь эмнэлгийн тусламж үзүүлэх ёстой байтал харин ч бүүр зодсон байгаа юм. Энэ үйлдэл нь үхлийн шалтгаан болсон. Энэхүү үйлдэл нь Эрүүгийн хуулийн тусгай ангийн 10,1-р зүйлд зааснаар хүнийг санаатайгаар алах зүйл ангид хамаарагдана. Талийгаачийг зодсон цэргийн алба хаагчид Эрүүгийн хэрэг нээх саналыг Улсын ерөнхий прокурор М.Энх-Амгалан, ЦЕГ-ын дарга С.Баатаржав нарт хандаж хүсэлт гаргасан" гэдгээ мэдэгдээд байгаа.

Өчигдөр амиа алдсан цэрэгт зориулан Эрдэнэт хотын иргэд 1200 гаруй лаа асаан хүндэтгэл үзүүлсэн байна. Армид алба хаахаар явсан хөвгүүд эжий аавдаа эсэн мэнд эргэн ирэх ёстой хэмээн үзэл бодлоо нэгтгэж гашуудан эмгэнэсэн юм