Автобуснаас хөөгдсөн оюутан осгож амиа алджээ

Украины умард хэсгийн Олевск хотын ойролцоохи ойд осгож нас барсан охиноо олоход нүдэнд нь айдас хурсан байсан гэж хохирогч Ирина Двортескагийн аав хэвлэлийнхэнд ярьжээ. Анагаахын сургуульд сурдаг 21 настай Ирина Двортеска эмнэлэгт хэвтэн эмчлүүлж буй ээжийгээ эргэхээр гэрээсээ гараад хоёр хоног сураггүй болсны эцэст тун харамсалтай байдалтай олдсон байна. Орон нутгийн хэвлэлд бичснээр бүсгүй автобусны зардал болох 25-хан гривнаг төлөөгүйгээс энэ харамсалтай хэрэг гарчээ. Автобусны жолооч Олег Зелинский бүсгүй шөнийн 04 цагт автобусанд суусан боловч үйлчилгээний хөлс байхгүй гэсэн учраас хүчээр буулгасан гэж тайлбарласан байна. Албаныхны таамгаар талийгч бүсгүй автобуснаас хөөгдөж буусныхаа дараа замаа товчлох гэж ой дундуур явж, улмаар төөрсөн бололтой юм. Хохирогчийн ар гэрийнхний өгч байгаа тайлбараар хохирогч бүсгүй хамгийн эхний автобусанд амжин суух гэж яарснаас мөнгөө гэртээ мартаж, ийм явдал болжээ. Харин цагдаагийн газраас үйлчлүүлэгчдээ хэт хайнга хандаж, улмаар амь насаа алдахад хүргэсэн автобусны жолооч Олег Зелинскийд эрүү үүсгэн шалгаж эхэлсэн байна.