Д.ТРАМП $7 ТЭРБУМААР ХАНА БАРИНА

Цагаачлалын эсрэг хатуу бодлого баримталж, Мексикийн хил дээр хана босгоно гэж амлаж гарч ирсэн АНУ-ын Ерөнхийлөгч Дональд Трамп эл ажилдаа долоон тэрбум ам.доллар зарцуулах хуулийн төсөл боловсруулж байгаа талаар Цагаан ордны хэвлэлийн албанаас мэдээлсэн байна. Урд хөршөөс нь чиглэх хууль буц цагаачдын урсгалыг таслан зогсоох зорилготой энэхүү ажлын улмаас Конгресс, Цагаан ордны хооронд ширүүхэн маргаан өрнөж, Засгийн газрын үйл ажиллагааг зогсоохдоо тулаад байгаа. Дээр нь Ерөнхийлөгчийн зөвлөгчид асуудалд хоёр янзын байр суурьтай хандаж байгаа ч гэсэн долоон тэрбумын өртөгтэй хуулийн төслийг Конгресст оруулахаар зүтгүүлж байгаа нь энэ юм.

Эх сурвалжийн дамжуулж буйгаар дээрхи долоон тэрбум долларын санхүүжилтийн 681 саяыг нь Эрдэнэсийн сангаас, 3.6 тэрбумыг нь зэвсэгт хүчнээс, 3 тэрбумыг нь Пентагоны иргэний хөдөлмөрийн сангаас, 200 саяыг нь Дотоодыг хамгаалах газрын сангаас тус тус гаргуулахаар төлөвлөсөн байна. Д.Трампийн хувьд хана барих ажлын санхүүг шийдэх өөр хэд хэдэн хувилбар байгаа гэж мэдэгдсэн боловч одоогийн байдлаар дэлгэрэнгүй мэдээлэл байхгүй байгаа юм.