ХУРД ХЭТРҮҮЛСЭН ЗӨРЧИЛ НЭГ ЦАГИЙН ДОТОР 10-15 БҮРТГЭГДЖЭЭ

Энэ долоо хоногт буюу нэгдүгээр сарын 14-18-ны өдрүүдэд Тээврийн цагдаагийн алба нийт 990 дуудлага хүлээн авснаас зам тээврийн ослын шинжтэй 760 дуудлага мэдээллийг хүлээн авсан байна. Нийт бүртгэгдсэн осол, хэргийн улмаас нийслэлд 18 хүн гэмтэж бэртэн, орон нутагт гурван хүний амь нас хохирсон ноцтой зам тээврийн ослууд бүртгэгджээ.

Зам тээврийн ослын 11 нь явган зорчигч мөргөж гэмтээсэн, 21 нь мөргөлдөх хэлбэрээр, гурван нь үл хөдлөх зүйл мөргөх, нэг нь онхолдох хэлбэрээр тус тус үйлдэгдсэн байна. Мөн хяналт шалгалтын үеэр согтуугаар тээврийн хэрэгсэл жолоодсон 132 жолоочийг илрүүлэн хуулийн дагуу хариуцлага тооцож, 15 жолоочийг шүүхээр баривчилж ажиллав.

Тухайлбал, Өвөрхангай аймгийн Уянга сумын нутаг "Өлзийт зүүн салаа" гэх газар шороон замд улсын дугааргүй Мустанг-5 маркийн мотоцикль онхолдож, жолооч М-н амь нас хохирсон,

-Сонгинохайрхан дүүргийн нутаг Нарангийн гудамж T.Pruis маркийн автомашины жолооч нь согтууруулах ундааны зүйл хэрэглэсэн үедээ тээврийн хэрэгсэл жолоодож T.Aqua автомашиныг мөргөөд, явган зорчигч хоёр хүнийг мөргөж гэмтээсэн.

Түүнчлэн ноцтой зам тээврийн ослын тэргүүлэх шалтгаанд хурд хэтрүүлсэнээс үүдэх осол хэрэг эзэлж байгаа бөгөөд зөвхөн нэг цагийн шалгалтаар энэ төрлийн зөрчил 10-15 бүртгэгдэж байна. Энэ төрлийн осол, зөрчлөөс урьдчилан сэргийлэх чиглэлээр нийслэлийн хэмжээнд алслагдсан гудамж зам, орон нутгийн замуудад зөөврийн хурд хэмжигчийг байрлуулан хяналт шалгалтыг явуулж байна