Ц.ДАВААСҮРЭН:V ЦАХИЛГААН СТАНЦЫГ БАРИХ БОЛОМЖГҮЙ БОЛСОН

-Ухаалаг эрчим хүчний системтэй болох суурийг 2019 онд тавина-

Энэ жилийг эрчим хүчний салбарт дэвшилтэт техник, технологийг нэвтрүүлсэн ухаалаг эрчим хүчний жил болгон зарласан. Энэ тухай Эрчим хүчний яамнаас өнөөдөр мэдээлэл хийлээ.

Энэ жил эхний ээлжинд ОХУ-тай хамтран турбин генераторууд дээр мэдрэгч төхөөрөмж тавихаар ажиллаж байгаа бөгөөд дэлхийн улс орнуудад хэрэгжин,практик дээр батлагдсан мэдрэх төхөөрөмж,програмуудыг үе шаттайгаар нэвтрүүлэхээр төлөвлөж байгаа аж. Цаашлаад дамжуулах сүлжээ, түгээх үе шатуудад мэдрэгч төхөөрөмжүүдийг байршуулах ажээ.

Дэвшилтэт техник, технологийг Эрчим хүчний салбарт ашигласнаар хэд хэдэн давуу талтай.

Нэгдүгээрт,

Дулааны хоолой дээр мэдрэх төхөөрөмжүүд тавьснаар хоолойд гарах өөрчлөлтүүдийг цаг тухай бүрт авах боломжтой болж байгаа. Үүний дүнд аваар, саатлыг урьдчилан мэдэж засварласнаар үйл ажиллагааны горим тогтмол, найдвартай болох юм.

Хоёрдугаарт,

Агаар орчны бохирдол болон хүлэмжийн хийг багасгахад тодорхой хэмжээнд нөлөөлөх юм. Станцуудын зуухнууд дээр дэвшилтэт технологи ашигласнаар хорт хийн ялгарлыг бууруулах арга хэмжээг авна.

Гуравдугаарт,

Диспетчерийн үндэсний төвөөр дамжуулан хэрэгцээт мэдээллүүдийг гар утсаараа дамжуулан авах боломжтой болох юм.

"Үүний тулд бидэнд алгоритм гаргадаг өндөр төвшний мэргэшсэн инженерүүд, Эрчим хүчний үйл ажиллагааны тухай ойлголттой програмистууд, техникийн ажилтнуудаас бүрдсэн ажиллах хүчин хэрэгтэй" гэж Эрчим хүчний сайд Ц.Даваасүрэн хэлж байлаа.

Өндөр төвшний мэргэшсэн програмист, инженерүүдээс бүрдсэн нэгжийг Диспетчерийн үндэсний төвд нэмж байгуулах ажээ.

Бэлтгэл ажлын хувьд яамны зүгээс харъяалагдах байгууллагуудад техник, технологийн шийдлийг ашиглах чиглэл, үйл ажиллагааг тодорхойлон холбогдох төсвийг тус тусын Төлөөлөн удирдах зөвлөлөөр батлуулах чиглэлийг өгөн ажиллаж байна. Харин 2019 оныг Ухаалаг эрчим хүчний системийн жил болгоход шаардагдах нэгдсэн төсвийг гаргаагүй байгаа юм байна.

Эрчим хүчний яамнаас 2019 онд Агаарын бохирдлыг бууруулах чиглэлээр хоёр үндсэн ажлыг хийхээр төлөвлөжээ.

НЭГД:

Нийслэлийн 42000 айл өрхөд кватын хүчин чадал бүхий, эдийн засгийн хувьд хэмнэлттэй халаагуур ашиглах боломжийг бүрдүүлэх

ХОЁРТ:

Жилд 250 мянган тонны хүчин чадалтай сайжруулсан шахмал түлшний үйлдвэрийн хүчин чадлыг 600 мянган тонн болгох шугамын ажлыг эхний хагас жилийн хугацаанд хийж гүйцэтгэнэ. Ирэх жилийн өвөл гэхэд нийслэлийн гэр хорооллын өрхүүдэд шахмал түлшийг нийлүүлж эхэлнэ.

Түүнчлэн Эрчим хүчний яамнаас одоо байгаа цахилгаан станцуудынхаа хүчин чадлыг нэмэгдүүлэх ажлыг хийхээр төлөвлөжээ.

Учир нь V цахилгаан станцыг барихаар ажиллаж байсан консерциум задарсан учир ойрын үед баригдах боломжгүй болжээ.

Тиймээс тухайлбал, II цахилгаан станцыг 350 ВТ-ын хүчин чадалтай болгон өргөтгөхөөр ТЭЗҮ-г боловсруулсан байна.