КАНАД УЛС НЭГ САЯ ЦАГААЧ ХҮЛЭЭН АВАХААР БОЛЖЭЭ

Канад улс 2017 онд 286 мянган цагаачдыг хүлээн авсан бол тус төлөвлөгөөний дагуу энэ тоог 2019 оны эцэс гэхэд 350 мянга 2020 онд 360 мянга 2021 онд 370 мянгад хүргэнэ гэв.

Цагаач, дүрвэгчдийг ихээр хүлээн авснаар улсын эдийн засаг болон аюулгүй байдалд сөргөөр нөлөөлж магадгүй хэмээн ард иргэд нь эмээж байсан ч 2018 оны эцэст гаргасан судалгаагаар шинээр суурьшсан иргэд улс орны хөгжилд маш их нэмэр болсныг харуулжээ. Тухайлбал, тус улсад тулгамдаад буй хүн амын хөгшрөлт, төрөлт буурах зэрэг тулгамдсан асуудлуудтай тэмцэхэд гадаадын цагаачид чухал үүрэг гүйцэтгэн, ажиллах хүчийг нэмэгдүүлснээр эдийн засагт нь эергээр нөлөөлж байгаа аж. Тиймээс ирэх гурван жилд дахин нэг сая цагаачдыг хүлээн авч, суурьшуулахаар төлөвлөсөн байна.

"Улс орны маань хөгжил цэцэглэлтэд гадаадаас ирсэн ажиллах хүчин чухал нөлөө үзүүлж байгаа нь талархууштай" хэмээн Канадын Цагаач, дүрвэгч, иргэншлийн яамны сайд Ахмед Хуссен хэлжээ. Тэрбээр өөрөө ч бас Сомали улсаас Канадад цагаачлан ирсэн аж.

АНУ тэргүүтэй барууны улс орнууд цагаачлалын бодлогоо улам хатуу чанга болгож байгаа энэ үед Канад улс улс орныхоо хөгжлийг дэмжих зорилгоор цагаачлалын бодлогоо улам уян хатан, нээлттэй болгож байна. Түүнчлэн дүрвэгчдийг хамгийн найрсгаар хүлээн авч байгаа улс нь Канад юм.

Канадын чанартай дээд боловсрол, цагаачлалын уян хатан бодлого, онгон байгаль, аялал жуулчлалын салбарын өндөр хөгжилд татагдан маш олон хүмүүс жил бүр Канадыг зорин очдог байна. Түүнчлэн тус улс нь өнгөрсөн жилээс марихуаныг хэрэглээг хуулиар зөвшөөрснөөр жуулчдыг ихээр татах болжээ.

Эх сурвалж: CNN, twentytwowords.com